Семей электрмен жабдықтау дистанциясы жазды қауырт жұмыспен бастады

Семей электрмен жабдықтау дистанциясы биылғы жазды карантиндік шектеулерге қарамастан қауырт жұмыспен бастады. Қазіргі таңда ЭЧ-18 мекемесі тарапынан желі бойында жүйелі жұмыс жүргізілуде. Айта кетерлігі, бұл теміржол ұжымы – күллі Шығыс аймағына, яғни, Семей және Защита өңірлеріне қатар қызмет көрсететін бірегей мекеме. Дегенмен жазғы жұмыстардың негізгі бөлігін көктемгі тексеру қорытындысы бойынша анықталған кемшін жағдаяттарды қалпына келтіру шаралары қамтуда. Атап айтсақ, өткен мамыр айындағы көрсеткіштер бойынша 147 міндеттемені орындау қажеттілігі туындаған болатын. Оның ішінде 48 бірлік әуе желілерінің күтімін жүргізу мен 2 жоғары кернеулі желі телімін бөлектеп алып ауыстырып қосатын ажыратқыш аппараттарды жаңалау, 5 күштік бағдаршамдарды жаңарту шаралары кезек күттірмейді. Бұл шаралардың сыртында 12 кабельдік желі мен 7 бірлік қорғаныс құрылғысын талапқа сай ету бойынша жұмыстар жүргізілді. Бұл орайда электрмен қамту мекемесінің қызметкерлері өздеріне берілген межелі мерзім ішінде жүктелген тапсырмаларды орындап шықты. Сонымен қатар, қазіргі таңда жыл үлесінде тұрған техникалық дәрістер өткізу мен техникалық құжаттамалар рәсімдеу бойынша да жоспардан қалып келе жатқан шаралар орындалу үстінде. Бұл ретте карантиндік шектеулер кедергі болған еді. Жалпы ЭЧ-18 мекемесі өткен аязды қысты тосын оқиғаларсыз аяқтап, көктемгі байқауды да сәтті өткізген болатын. Мәселен, өткен жылдың есепті мерзіміндегі тіркелген кемшіліктер қатары биыл 107 бірлікке кеміпті. Бұдан өзге желі бойындағы электрмен қамту құрылғыларын жаңарту, күрделі жөндеуден өткізіп, бекітілген талапқа сай жұмыс жүргізу бойынша кешенді шаралар қабылдануда. Оның аясында қоректендіргіш құрылғыларды орнату, желі бойындағы бірқатар теміржол нысандарын жарықтандыру сынды шаралар кезең-кезеңімен жүзеге асырылуда. Мекеме басшылығының айтуынша, ағымдағы жылы дистанцияға қарасты әуе желілерінің көбін ауыстырып, желі бойындағы тіректерді қайта жаңарту жұмыстары да атқарылмақ. Құрылғылар мен нысандарды қысқа даярлау шаралары қараша айына дейін жалғасатын болады. Бүгінгі таңда бөлімше бойынша трансформаторлық пункттерге кезекті қызметтік тексерулер жүргізілуде. Қазіргі таңда электрмен қамту ісі бойынша да өндіріске тың жаңашылдықтар енгізіліп, жаңа құрылғылар қолданысқа берілуде. Заманауи игіліктер бойынша ЭЧ-18 дистанциясында да жетістіктер жетерлік. Соңғы үш жылдың көлемінде жоғары вольтті вакуумды қосқыштар орнату, желі бойындағы еншілес мекемелер мен шалғайдағы станциялар бойынша электр үнемдегіш жарық-диодты шамдар орнату жұмыстары жүргізіліп келеді. Пойыз қозғалысының қауіпсіздігін сақтауда мұндай жұмыстарды тыңғылықты түрде жүргізу – заман талабы. Бұл орайда іс басындағы ЭЧ-18 электр монтерлары үшін барынша қолайлы жағдай жасалған. Қазіргі таңда Нұрлан Әзімханов басқаратын ұжым бекітілген жоспар бойынша осылайша үлгерімді жұмыс жүргізуде. Бұл орайдағы тағы бір басты міндет бөлімше бойынша барлық ескірген электр желілерін қайта жаңалау болып отыр.