Медицина мамандары маңғыстаулық теміржолшыларға кеңес берді
Маңғыстау облысы бойынша меншікті тілші
Жуырда маңғыстаулық теміржолшылар медицина мамандарымен кезедесіп, көкейдегі сан түрлі сұраққа жауап тапты. Кездесу әлемді жайлаған соvid-19 індетіне қарсы екпе туралы болды. Қауіпті індетке қарсы екпе жүргізу бойынша еңбек ұжымдарына түсіндіру жұмыстарын жүргізу мақсатында құрылған Мұнайлы аудандық ақпараттық насихат тобының өкілдері шілде айының бірінші күнінен бастап теміржол мекемелерін аралауға кірісті. Бас-аяғы он еңбек ұжымында болып, теміржолшылармен жолығып, вакцина алудың маңыздылығын түсіндірген олар көпшіліктің сан алуан сұрақтарына да жауап берді. Жиын Маңғыстау магистральдық желі бөлімшесінде басталып, әскерилендірілген теміржол күзетінде аяқталды. − Жиналыстарда бас санитар дәрігердің қаулысы түсіндіріліп, осы жөнінде түсіндіру, ақпарат жұмыстары жүргізілді. Көбінің білгісі келетіні – кімге егуге болады, кімге болмайды. Қорқыныш та бар. Қорқынышты сейілтіп, екпе мәселесінің анық-қанығы жайлы толық мағлұмат берілді. Егуге болмайтын топтағылар туралы таныстырдық. Ондай денсаулығында ақау бар адам дәрігерге қаралып, қорытындысын көрсетуі керек. Аталған нәтижені емханада бірнеше маманнан тұратын комиссия шығарады. Мұны мекеме басшылары да білгені абзал. Себебі 15 шілдеден кейін еңбек ұжымдарына мониторинг топтар бақылауға шығады. Егер сол кезде еш себепсіз екпе алмаған адам жұмыста жүрсе, ол үшін басшысына айыппұл салынады, – дейді Мұнайлы ауданы бойынша санитарлық-эпидемиологиялық бақылау басқармасы басшысы Ботагөз Исаева. Айта кетсек, екпе алу қарқыны түбек теміржолшылары арасында күннен күнге артуда. Мәселен жүк тасымалы бөлімшесі бойынша мамыр айының соңында, яғни 28 мамырда 476 болса, 7 шілдеде ол 1172 адамға жетті немесе 60.9 пайызды құрады.