Салааралық кәсіподақ ұйымдары байқауының жеңімпазы анықталды
«Қазақстан теміржолшысы» газетінің тілшісі
Оразалы Ерубаев – теміржолшылар әулетінің өкілі. Еңбек жолын жол шаруашылығында кадр бөлімінде бастаған ол бүгінде Қырқыншы машиналандырылған жол дистанциясында кәсіподақ комитетінің төрағасы. Жақында бастауыш кәсіподақ ұйымы осы саладағы арнайы байқауда жеңімпаз атанды. Ақмола өңірінде туып-өскен ол теміржол саласындағы еңбек жолын 2001 жылы бастап, ПЧ-17 мекемесінде кадр бөлімін басқарады. Құқықтық салада білімі бар, сауатты маман 2010 жылы кәсіподақ төрағалығына сайланады.
– Кәсіподақ жұмысы оңай емес, тынымсыз да мазасыз жұмыс. Теміржолшылар құқының қорғалуын қамтамасыз ету, еңбек тәртібінің бұзылмауын қадағалау барысында талай кедергілерге тап болу мүмкіндігі бар, қиын жағдайға түскен жұмысшыларға қолдау көрсетіп, сонымен қатар түрлі қайырымдылық шараларын, спорттық додалар ұйымдастырамыз. Біздің ұжым әсіресе қайырымдылық көрсетуде өте белсенді, мәселен, биыл үйлері өртеніп кеткен әріптестерімізге көмек көрсеттік. Сосын кәсіподақ жұмысы уақытылы есеп беріп отыруды да қажет етеді, – дейді О.Ерубаев кәсіподақ ісінің қыр- сырын түсіндіріп.
Теміржолда 41 жыл еңбек еткен, станция кезекшісі болған әкесі Сунат Ерубаев та кәсіподақ төрағалығына сайланып, 24 жыл қызмет атқарған екен. Анасы Нағима да станция кезекшісі, тауар кассирі болған. Әкесінің інісі де осы станцияда еңбек еткен. Осындай теміржолшылар әулетінің тікелей ұрпағы бола тұра ол әу баста заңгер мамандығын таңдап, біраз жыл құқық қорғау саласында еңбек етіпті.
– Бірақ жылдар өтіп, әулетіміздің төл кәсібіне мен де оралдым. Қазір төрт ұл немеремнің үлкені теміржол саласында жоғары білім алуда. Сол немерем ата кәсібін жалғастырады деп үміттенемін, – дейді кәсіподақ жетекшісі.
Кейіпкеріміз рас айтады, кәсіп- одақ комитетін басқару кез келгеннің қолынан келетін жұмыс емес. Көпшілікпен жұмыс істей білу, дау-дамай, талас-тартысты екі жаққа да оңтайлы шеше білумен қатар, саладағы құқықтық нормаларды жетік білу керек. Бүгінде зейнет жасына жеткен кейіпкеріміздің іскерлігін бағалайтын ұжымы аттай қалап оны тағы 5 жылға сайлап отыр.