Болашақ станциясына 10 жылда алғаш рет келін түсті
Маңғыстау облысы бойынша меншікті тілші
Түркіменстанмен шекарадағы Болашақ станциясында бүгін – беташар той. Болашақ болашақ болғалы он жылға жуық уақыт ішінде ауылға алғаш рет келін түсіп, теміржолшылар ауылы мәре-сәре болды. Ақ сақалды қариялар батасын беріп, кейуаналар шашуын шашып, шекара өткеліндегі станцияда кәдімгідей мереке. Келін «Теміржолсу» мекемесінің ардагері, станцияның құрылысына атсалысқан Қарасай Калекеевтің босағасын аттады. Кенже ұлы Асқардың бір басы екеу болып, Қарақалпақстанмен құда болды. Отыздан өткен шағында отау тіккен Асқар Калекеевтің өзі де теміржолшы. Маңғыстау белгі беру және байланыс дистанциясының Болашақтағы СЦБ электромеханигі. 2009 жылы елге оралған олар – ат басын бірден осында бұрып, жаңа станцияның қалыптасуына үлесін қосқан алғашқы қоныстанушылар.
– Әкем Болашаққа құрылысы жүріп жатқан кезде келіп, жұмысқа орналасты. Бір жылдан кейін біз де көшіп келіп, қоныстандық, үй алдық, жұмысқа орналастық. Болашақ біздің отбасымыз үшін құтты орынға айналды, – дейді көрші елдің күйеу баласы атанып, Мақпал есімді қызды жар еткен жігіт. Ақтөбедегі теміржолдың жоғары оқу орнын бітірген Асқардың негізгі мамандығы – автоматтандыру саласы.
– Бұл – станциямызда болып жатқан алғашқы келін той. Бұған дейін де келіндер түскен, бірақ олар қалада бас қосып, тойын жасап, кейін келіп жататын. Бүгін ауылға келін түсіп, Болашақ тұрғындары ерекше қуанышты, «той десе қу бас домалайды» демекші, үлкен де, кіші де мәз, ұзағынан сүйіндірісін, – дейді Болашақ станциясының бастығы Мақсат Нұрбеков.