Өзен станциясындағы анасыз өсіп жатқан бүлдіршіндерге 200 мың теңгенің сертификаты табысталды
Маңғыстау облысы бойынша меншікті тілші
Теміржолшылар кәсіби одағы орталық кеңесінің «Тілектер шыршасы» атты акциясы аясында Өзен станциясында еңбек ететін теміржолшының балалары 200 мың теңгенің сертификатына ие болды, деп хабарлайды Rail-news.kz. Осылайша, жаңа жылда Аяз ата көп балалы отбасында анасыз өсіп жатқан бүлдіршіндердің тілегін орындады. Сертификатты Теміржолшылар кәсіби одағының Маңғыстаудағы өкілі Әзірбай Тұрмағанбетов табыстап, балалардың қалаған нәрсесін алуына көмектесті. Арманына қол жеткізген балақайлардың қуанышында шек жоқ...
– Теміржолшылар кәсіби одағы орталық кеңесі әр өңірге осындай бір сертификаттан бөліп, балаларға жаңажылдық сыйлық жасауда. Біз оны Өзен станциясында еңбек ететін жалғызбасты әке Бекболат Тоғызбаевқа беруді ұйғарып, өз қолымызбен тапсырдық. Әйелі дүниеден өткен, балаларының бірінің мүмкіндігі шектеулі. Үшеуі мектепте оқиды. Онлайн сабаққа керек деп үшеуі де ұялы телефон сатып алды, – дейді Әзірбай Тұрмағанбетов.
Бекболат Тоғызбаев станцияның Б паркінде жүк көлігін жүргізеді. Перзенттерінің алды жетінші сыныпта болса, кішісі жеті жаста. Әйелі 2017 жылы Жаңаөзендегі теміржол өткелінде пойызбен соғысқан газель көлігінде апат салдарынан қайтыс болған.
– Балапандарымның қуанышын көріп төбем көкке жетті. Осындай мүмкіндік беріп отырған теміржолдың кәсіподақ ұйымына алғысым шексіз. Отбасында әке де, ана да болып бала өсіру оңай емес екен, басқа түскен соң көріп жатырмыз. Қиын-қыстау шақта басшылықтың, әріптестерімнің қолдау-көмегі – маған үлкен күш. Барлығына рахмет! – деп ризашылығын білдірді көп балалы әке.