Балалар демалысы: маңғыстаулық теміржолшылар қауіпсіздік шараларын күшейтті
Маңғыстау облысы бойынша меншікті тілші
Оқушылар екінші тоқсанды аяқтап, жаңажылдық демалысқа шықты. Сабақтан қолы босаған жасөспірімдердің әрі-бері жүрісі жиілейтіні белгілі. Осыған байланысты түбек теміржолшылары полиция өкілдерімен бірге қауіпсіздік шараларын күшейтті.
Олар жаңа жыл қарсаңында теміржолға жақын маңдағы мектептерді аралап, оқушылар арасында түсінік жұмыстарын жүргізді. Бейнеу станциясындағы Абай мектебінде станция бастығы Е.Хайруллин және Әскерилендірілген темір жол күзетінің бастығы Сарсенов Нұрбол, полиция старшинасы А.Баймбетов оқушылармен кездесіп, теміржолдағы жүріс тұрыс ережелерін қатаң сақтап қана қоймай сигналдарға құлақ асып, ескерту плакаттарына назар аударып, мұқият қадағалауы қажеттігін айтып, түрлі мысалдар келтірді, буклеттер таратты.
Мұндай профилактикалық шараларды Болашақ станциясының теміржолшылары да өткізді.
Сай-Өтестік теміржолшылар мен станциядағы желілік полиция қызметкерлері мереке күндері теміржол бойында күзет ұйымдастырды. Темір жолдың белгіленбеген жерінен өткендер ҚР ӘҚБтК-нің 559 бабының 5-бөлігіне сәйкес әкімшілік шараға тартылатындығы туралы ескертті.
Шахида Жұман