Түбек теміржолшылары қан тапсырды
Маңғыстау облысы бойынша меншікті тілші
Ел басына күн туғанда жүрегі елім деп соғатын әрбір адам халқының қиындығын жеңілдетуге асығады. Осы орайда маңғыстаулық теміржолшылар да өз үлесін қосуда. Бүлікшілердің кесірінен зардап шешіп, ауруханада жатқан жандарға арнап қан тапсыруда. Науқастарға қазіргі ауадай қажет нәрсенің бірі де осы.
Кеше Маңғыстаудағы қан орталығында жұмыс күні басталысымен алғашқы келген донорлар теміржолшылар болды. Біріншілерден болып Маңғыстау қосалқы бөлімшесі бастығы Нәжімеден Ғұбашов пен теміржолшылар кәсібі одағының Маңғыстаудағы өкілі Әзірбай Тұрмағанбетов, бөлімшенің персоналды басқару бөлімі басшысы Екпін Қожахметов және бөлім басшылары қан тапсырды.
Таңғы сағат сегізден түске дейін елуге жуық теміржолшы донорлық қадамын жасады. Олардың ішінде отбасымен келіп жатқандары да бар. Бұл бірінші күнгі көрсеткіш. Екпін Қожахметовтың айтуынша, қан тапсыруға кезегін күтіп тұрған теміржолшылар әлі көп. Мұқтаж жандарға өз қаны арқылы көмектесуге келетін сала қызметкерлерінің саны алдағы екі күннің ішінде тағы да артатүспек.
Шахида Жұман