Шымкенттік теміржолшылар екі күнде 15 литр қан тапсырды
Елімізде болған жаппай тәртіпсіздік кезінде зардап шеккен әскерилер мен құқық қорғау және арнайы мемлекеттік органның қызметкерлері үшін қан тапсыру акциясын шымкенттік теміржолшылар да жалғастырып әкетті, деп хабарлайды Rail-news.kz.
Екі күн ішінде отыздан астам теміржолшы Шымкент қалалық қан орталығына келіп 15 литр қан тапсырды. Теміржолшыларды бастап барған Шымкент магистралдық желі бөлімшесінің бас инженері Мұхтарбай Битеміров мұқтаж жандарға көмек беру әркімнің азаматтық парызы екенін айтып өтті.
Шымкент магистральдық желі бөлімшесімен қоса Шымкент жүк тасымалы бөлімшесінің де теміржолшылары қан тапсыруға кезекте тұр. Себебі, қалалық қан орталығында коронавирус індетіне байланысты адамдардың шоғырлануына рұқсат етілмейді.
Сонымен қатар, қан тапсырған теміржолшылардың бір күн жұмыстан босатылатыны айтылды.
