Үш күн ішінде 400-ге жуық теміржолшы қан тапсырған
Елімізде жыл басында болған жаппай тәртіпсіздік кезінде зардап шеккендерге қан тапсыру акциясын теміржолшылар бастады. Үш күн ішінде 400-ге жуық теміржолшы қан тапсырған.
Олардың қатарында бұрыннан донор болып жүрген теміржолшылармен қатар бұл жолы жастардың белсенділігі жоғары болды. Жараланғандар мен науқастар үшін ерікті түрде қан тапсырғандар қатарынан тіпті зейнеткерлер де қалыс қалмаған.
Алғаш болып бұл акцияны батыстық теміржолшылар бастап, оны барлық аймақтар қолдап жалғастырып әкетті. Атап айтқанда, Маңғыстау, Шымкент, Ақтөбе, Қызылорда, Жамбыл, Алматы т.б өңір теміржолшылары ерекше белсенділік танытты. Мәселен, Шымкент қаласында екі күн ішінде отыздан астам теміржолшы қан орталығына келіп қан тапсырды. Қызылордада бір күнде алты мекеменің теміржолшылары қан тапсырды. Ақтөбелік теміржолшылар бір күнде он бес литр қан тапсырды. Бір адамнан алынған қан екі науқастың өміріне араша болатынын айтқан дәрігерлер теміржолшыларға алғысын жеткізді.