Семейдегі теміржолшы жастар қоғамдық іс-шараларда белсенді
Абай облысы бойынша меншікті тілші
Семей теміржолының жастары қоғамдық іс-шараларда ерекше белсенділігімен танылған. Әсіресе, өңір бойынша ұйымдастырылатын түрлі қайырымдылық акцияларында теміржолшылар жақсылық жасап жарысуда.
Теміржолшы жастардың белсенділігінің бір айғағы сол, олар облыс бойынша ұйымдастырылған түрлі шараларда бас бәйгені бермей жүр. Мәселен, облыс орталығы Өскемен қаласында «Жастар жылына» орай зауыттар мен кәсіпорындардағы жұмысшы жастар арасында аймақтық деңгейдегі өткен VII «Қайратты жастар» байқауында семейлік теміржолшы жастар үздіктер қатарынан табылған болатын.
Оған бір себеп, жастардың аймақ бойынша өтіп жатқан «Қайырымды істер марафоны» жобасына ерекше белсенділікпен қатысуы десек, қателес- пейміз. Өңірдегі ең үлкен компанияға жергілікті әкімдіктің жастар ісі секторы көп арқа сүйейді. Сондықтан, Жеңіс мерекесі, қарттар күні, аз қамтылған отбасыларды әлеуметтік қолдау, қан тапсыру сынды шараларда алдыңғы орында теміржолшылар жүреді.
Жалпы, Мемлекет басшысының бастамасы бойынша қолға алынған «Қайырымды істер марафоны» жалпыұлттық жобасын іске асыру бойынша ШҚО республика бойынша үздік нәтиже көрсеткенін айта кету керек. Құрамында семейлік теміржолшы жастар бар еріктілер 3 мыңға жуық әлеуметтік және қайырымдылық шаралар ұйымдастырып, 24 мыңнан астам адамға көмек қолын созыпты.
«Мұндай шаралар биылғы жылы да жалғасын табатын болады. Қазіргі таңда бөлімше басшылығының, кәсіподақ ұйымының ақыл қосуымен арнайы жұмыс жоспарын әзірлеп жатырмыз. Жастар тарапынан ұсынылатын креативті идеялар да қабылданады», – дейді жастар жетекшісі.