Қауіптілігі жоғары жұмыстан ұзақ уақыт қол үзгендер үшін сынақ қалай жүргізіледі?

  – Бала босануыма байланысты 3 жыл декреттік демалыстан кейін электрмен жабдықтау дистанциясында (ЭЧ) жұмысқа шықтым. Электр қауіпсіздігі бойынша топта екенімді растауым қажет пе? Қай топтағы қызметкер мені стажировкадан өткізуі керек?

Оқырман сауалына «Қазкөліккәсіп» ҚБ еңбек қорғау бойынша техникалық бас инспекторы Қайрат Мұқанов жауап береді:

– ҚР ДС және ӘД министрлігі №1019 бұйрығының 12-тармағына сәйкес аталған жұмыс, қызмет, кәсіп түрі бойынша жұмыстан үш немесе одан көп уақытқа, ал қауіптілігі аса жоғары жұмыстан 1 жылдан астам уақытқа үзіліс алған жұмысшылар жұмысқа толық кіріскенге дейін еңбек қорғау және қауіпсіздік бойынша оқудан өтуі керек, сәйкесінше дистанциядағы комиссия тексеруінен де өтеді.

– Сонымен қатар ҚР ЭМ-нің 26.03.15 жылғы «Персоналмен жұмыс Ережелерін бекіту туралы» №234 бұйрығының 44-тармақшасына сәйкес ұйым немесе құрылымдық бөлімшелер бойынша өкімдік құжаттама арқылы стажировкадан өтуге рұқсат етіледі. Өкімдік құжаттамада стажировка мерзімі, стажировкадан өтетін тұлғаның аты-жөні көрсетіліп, электр қауіпсіздігі бойынша ІV дәрежеден төмен емес топтағы стажировкаға жауапты адам тағайындалады.

ҚР ЭМ №234 бұйрығының 45-тармағына сәйкес әр жұмыс орнындағы стажировка ұзақтығы мамандыққа қарай, оқуға қатысушының дайындығына байланысты анықталады және 2-20 жұмыс күніне дейінгі уақытқа созылады. Дайындықтың жеке бағдарламасы болған жағдайда стажировка мерзімі сол бағдарлама бойынша анықталады.

ҚР ЭМ №234 бұйрығының 47-тармағына сәйкес бастапқы біліктілік тексеруінен және жұмыста ұзақ уақыт үзіліс алғаннан кейін (үш аптадан алты айға дейін) стажировкадан қайталап өту мүмкіндігі қарастырылады.