Тәртіп сақшылары «Өтес» мектебінде кездесу өткізді
Маңғыстау облысы бойынша меншікті тілші
7-11 ақпан аралығында Маңғыстауда өтіп жатқан «Көліктегі қауіпсіздік» акциясы аясында Сай-Өтес станциясындағы желілік полиция бөлімінің қызметкерлері теміржолға жақын орналасқан «Өтес» мектебінде кездесу өткізді.
Желілік полиция бөлімі мен ауыл әкімдігі бірлесе ұйымдастырған шарада қауіпті аймақ саналатын темір жол бойында ойнауға және белгіленбеген жерден өтуге неліктен тыйым салынатыны егжей-тегжей мысалдармен түсіндіріліп, арнайы ережелер таныстырылды.
– Ойын баласы қызық көріп теміржолға шығып кетуі жиі кездеседі. Оның арты орны толмас өкінішке ұрындырып жатқанын да көріп жүрміз. Сондықтан, біздің мақсатымыз – балаларды сақтандыру, темір жолдағы қауіпсіз жүріс-тұрыс ережелерін үйрету. Жол бойындағы белгілердің, бағдаршамның, шлагбаумның орналасуын және өткел кезекшісінің нұсқауын назарға алу қажеттігін, яғни қауіпсіздікті әркім өзінен бастауы керек екенін түсіндірдік, арнайы буклеттер тараттық, – дейді Сай-Өтес ст. ЖПб инспекторы Нұрлыбек Рахметов.
Инспекторлар, сондай-ақ, жолаушылар пойыздарына тас ату, жолға бөгде зат қоюдың салдары туралы да балаларға ескертіп, сондай бұзақылық кесірінен болатын ауыр жағдайларға шолу жасады.