ҚТЖ басшысы теміржолшы аруларды мерекелерімен құттықтады
«Қазақстан теміржолшысы» газетінің тілшісі
Халықаралық әйелдер мерекесі қарсаңында «ҚТЖ» ҰК» АҚ басқарма төрағасы Нұрлан Сауранбаев Қазақстанның теміржол саласында еңбек етіп жүрген аруларын құттықтады.
«Бұл ән – бұрынғы әннен өзгерек» дегендей, биылғы мереке теміржолшы қыз-келіншектер үшін тосынсыйға толы болды. Ұлттық компания басшысы нәзік жандары төл мерекелерімен құттықтады. «Жолы – темір, ал адамдары – алтын» дейтін теміржолда әйелдер қауымының ролі ерекше. Сіздерге мықты денсаулық, толағай табыс және әйел бақытын тілеймін!», – деп ақжарма тілегін арнаған Н. Сауранбаев мереке иелелеріне Алғыс хат пен Құрмет грамотасын табыс етіп, тағы бірқатар қызметкерді «Адал еңбегі үшін» төсбелгісімен марапаттады. Алғыс хатпен марапатталғандарға – 6 АЕК, Құрмет грамотасына ие болғандарға – 8 АЕК, «Адал еңбегі үшін» төсбелгісін алғандарға 40 АЕК көлемінде арнайы сыйақы берілді.
Ұлттық компания орталық ғимаратының үшінші қабатында ханымдар құрметіне ұйымдастырылған арнайы фуршет пен концерт әйелдерге мерекелік көңіл-күй сыйлады. Бір айта кетерлігі – концерттік бағдарламаға сырттан әншілер шақырылмай, ҚТЖ компаниясының ер азаматтары өз өнерлерін көрсеткені әйелдер қауымы үшін нағыз тосынсый болды. Жоғары деңгейде ұйымдастырылған салтанатты жиында теміржол аруларына ерекше құрмет көрсетілді.
Мереке құрметіне «ҚТЖ-Жүк тасымалы» ЖШС басшылығы көп балалы және балаларды қамқорлығына алған әйелдерді арнайы марапаттады. Еңбекте абыройлы қызмет атқарумен қатар отбасында асыл жар, аяулы ана болып жүрген 25 нәзік жан иесін Серіктестік бас директорының орынбасарлары Қанат Көбесов пен Нұржан Қалдыбатыр құттықтап, жоғары кәсібилігі мен еңбекқорлығы, өз ісіне деген адалдығы үшін алғыс білдірді.