Балқаштық машинист көмекшісі өлке теміржолы туралы кітап жазды
«Қазақстан теміржолшысы» газетінің тілшісі
Балқаш локомотив пайдалану депосының машинист көмекшісі Алмас Арынов өзі қызмет ететін депо тарихы туралы «Темір жолы – өмір жолы» атты кітап шығарды, деп хабарлайды Rail-news.kz.
Қарағандыда арнайы лицейде машинист көмекшісі мамандығы бойынша білім алған Алмас – ордабұзар отыздан енді асқан жас жігіт. Балқаш локомотив депосында 2010 жылдан бері еңбек етеді. Пандемия басталған кезде бос уақытында кітап оқып, білімін жетілдіруді көздеген ол қаладағы кітапханаға бас сұғады. Әдеби кітаптардан бөлек жалпы Қазақстанның, оның ішінде Балқаш теміржолының тарихы туралы кітап іздейді.
Осылайша қарапайым машинист көмекшісінің кітап шығарудағы қызық та кедергіге толы қадамы басталып кеткен. Алдымен ол депода еңбек еткен зейнеткерлерді іздеп тауып, естеліктерін жазып алып, дерек-дәйектер, фотолар жинақтайды. Қалыбек Саттарұлы сынды бұрынғы басшылар ақпарат жинауға қолдау көрсеткен. Алмастың бастапқы ойы Балқаш-Мойынты-Саяқ теміржолының тарихын жазу еді. Алайда үш өңірді шарлап жүріп, ол бұл ауқымда кітап жазу күрделі боларын түсінеді.
Алмас одан әрі жазылған кітапты әдеби редакциялап, өңдейтін журналист табады, сосын кітаптың алғашқы түпнұсқасын басшыларға көрсетіп, артық-кемін алып қосады да, баспахана, сосын демеуші іздеуге кіріседі. Депо тарихы туралы тың деректер жинау үшін оған мәдениет бөлімі арқылы архивтерге кіруге рұқсат беріледі. Міне, сонда ғана оның еңбегін бағалаған біраз адам демеушілік жасайды. Елордаға келіп «ҚТЖ-Жүк тасымалы» ЖШС басшыларына да жолыққан. Сол кездегі басшылардың бірі Иван Костыря кітапқа алғысөз де жазып берген. Пандемия кезінде жазылған еңбек осылай кітап болып баспадан шығады.
Кітаптың тұсаукесері Балқаш қаласында С. Сейфуллин атындағы кітапханада биыл 7 сәуірде өтеді. Оның бірнеше данасын Алмас теміржол кітапханалары мен музейлерге таратып берген.