Тегін медициналық сақтандыру отбасы мүшелеріне де тиесілі

Маңғыстау локомотив депосында теміржолшыларды медициналық сақтандыру бойынша 670 адам аталған қызметті тегін алады. Соның нәтижесінде олардың отбасы мүшелерінің де бұл қызметке қол жеткізу мүмкіндігі бар, яғни, сақтандыру – отбасы мүшелеріне де тиесілі.

Сақтандыру шартына сәйкес медициналық қызметті алатындар екі санатқа бөлінеді. Олар екінші және төртінші санаттағы, яғни, жұмысшылар мен басшылық құрам. Депода екінші санатта 579, төртінші санатта 91 адам медициналық қызмет алуға тіркелген. Қазір отбасы мүшелерінен басқа теміржолшылар құрамы толықтай сақтандыру карточкаларын алған. Отбасы мүшелерінің полисі енді келетін көрінеді. Бірақ олар қажет болса келуін күтпей-ақ, жеке құжатымен барып, аталған мүмкіндікті пайдалануына болады.

– Екінші санаттағылардың отбасы мүшелерінен тек біреуі, төртінші категория- дағылардың жақындарынан екі адам тегін медициналық қызмет ала алады. Ол ата-анасы немесе балалары деген сияқты ет жақын жандары болуы керек. Бізде Маңғыстау және Бейнеу, Өзен айналым деполары мен Шетпе айналым пунктінде осы мәселе бойынша тіркеп отыратын арнайы адамдарымыз бар. Сақтандыру талаптарына байланысты медициналық мекемеде қызметтер ақысыз түрде жүргізіледі. Тек белгіленген лимитінен асып кетпесе болды. Бірақ қазірге дейін ешкім шағым айтып, лимитіміз жетпей қалды деген дау болған жоқ, – дейді Маңғыстау локомотив депосының кадр жөніндегі менеджері Серік Қошқарбаев.