Теміржолшыларға құқықтық көмек әрдайым беріледі

Атырау жүк тасымалы бөлімшесінде екі мыңдай адам еңбек етеді. Бөлімшенің заң қызметкері Дәурен Оңдасыновтың айтуынша, теміржолшылардың жыл басынан бері құқықтық тұрғыда кеңес алуға жеке өтінішімен 11 теміржолшы жүгініпті.

  Олардың сұрақтары да әртүрлі, біреуі денсаулығына байланысты ауыр жұмыстан жеңіл жұмысқа ауыстыру мүмкіндігін сұрайды, екіншісі еңбек дауымен тәртіптік жауапкершілікті алып тастауды, ал үшінші біреуі жұмыстан шеттетпей, қайта жұмысқа қосудың заңдылығын білгісі келеді. 

– Алдымызға келіп, заң тәртібін түсіндіруді өтінген адамдармен үнемі жұмыс жасап, құқықтық кеңес беріп келеміз. Кәсіподақ ұйымымен бірлесіп азаматтардың конституциялық құқығы бұзылмауына қатысты түрлі мәселелерді бірлесіп шешуге тырысамыз және ұжымдық шартта көрсетілген талаптардың мүлтіксіз орындалуын қадағалаймыз, – дейді заңгер. 

Биылғы 7 айда еңбек тәртібін сақтамай, жұмыс орнында тәртіп бұзушылыққа жол беру бойынша 457 ескерту, 190 сөгіс, 19 қатаң сөгіс беріліпті. Олардың сипаттары да әртүрлі, көбінесе жұмысқа кешігу, еңбекке жарамсыздық парақшасын уақытында тапсырмау, өз міндетіне салғырт қарау, тапсырманы уақытында орындамау, т.б. Сол себептен де заңгерлер тарапынан станцияларға, салалық мекемелерге барып, түсіндірме жұмыстары жүргізіліп отырады.