Білім күні теміржолшылардың балаларына сыйлықтар берілді
Ақтөбе облысы бойынша меншікті тілші
«ҚТЖ-Жүк тасымалы» Батыс аймақтық филиалында биыл «Мектепке жол» қайырымдылық акциясы ауқымды түрде өткізілді, деп хабарлайды Rail-news.kz.
Акцияның мақсаты – мектеп табалдырығын бірінші рет аттаған бүлдіршіндерді құттықтау және көп балалы отбасылардан шыққан балаларға материалдық көмек көрсету.
Бөлімшенің мәжіліс залында өткен жиында Ақтөбе қалалық балалар театры өнер көрсетті. Батыс аймақтық филиалының бастығы Бөріхан Беркімбаев балаларды жаңа оқу жылымен құттықтады.
«Бүгінгі шараға мектеп табалдырығын алғаш аттап жатқан кішкентай бүлдіршіндеріміз қатысып жатыр. Бүгінгі салтанаттың кейіпкерлері де солар. Балаларымызға ақ жол тілейміз. Зерек, зейінді болып өссін! Білімді ұрпақ – ел болашағы. Теміржолшылардың балаларын қолдауға әрдайым дайынбыз», – деді балаларға сыйлық таратқан филиал басшысы.