Мектепке жол: Маңғыстауда көпбалалы отбасыларға материалдық көмек көрсетілді
Маңғыстау облысы бойынша меншікті тілші
«Мектепке жол» акциясы аясында Маңғыстау бөлімшесі бойынша көп балалы теміржолшылар отбасының және өзге де қызметкерлердің 1-сыныпқа баратын балаларына мектеп құралдары толтырылған сөмкелер табыс етілді, деп хабарлайды Rail-news.kz.
Маңғыстау бөлімшесі кадр бөлімінің басшысы Екпін Қожахметовтің айтуынша, 1 қыркүйек – Білім күніне орай ұжымдық шарт бойынша Маңғыстау қосалқы бөлімі тарапынан үш баласы мектепке баратын қызметкерлердің балаларының әрқайсысына 6 360 теңге және көп балалы отбасыларға 12 мың 720 теңге материалдық көмек көрсетілуде.
– Теміржолшылар кәсіби одағы жыл сайын «Мектепке жол» акциясына белсене қатысады. Биыл өңір теміржолшыларының ішінен балалары мектепке баратын жалғызбасты ана, көп баласы барларды іріктеп алып, 140 мектеп сөмкесін сыйлап отырмыз, – дейді сала кәсіподағының Маңғыстаудағы өкілі Әзірбай Тұрмағанбетов.
Қысқасы, түбек темір жолы бойынша биыл мектеп табалдырығын аттаған төрт жүзге жуық теміржолшылардың баласына сыйлық жасалған.