ҚТЖ төрағасы салалық кәсіподақты 30 жылдығымен құттықтады
Құрметті «Қазкөліккәсіп» ҚБ ұжымы және сала ардагерлері!
Еңбек адамының құқығын қорғап, жұмыс берушімен өзара тиімді байланысты нығайтуға үлес қосып келе жатқан «Қазақстанның теміржол, автомобиль, әуе және су көлігі еңбеккерлерінің салалық кәсіподағы» қоғамдық бірлестігіне 30 жыл толып отыр.
Өткен үш онжылдықта «Қазкөліккәсіп» қоғамдық бірлестігі төрт көлік түрі бойынша 100 мыңнан астам жұмысшы-қызметкердің басын біріктірген ірі және беделді ұйымға айналды. Бірлестік Теміржолшылар кәсіподағы халықаралық конфедерациясының, ҚР Кәсіподақ федерациясы құрылтайшыларының бірі, сонымен қатар Көлікшілердің Халықаралық федерациясына мүше болып табылады.
Осы уақыт аралығында Кәсіподақ өкілдері Ұлттық компания жұмысшыларының, сала ардагерлерінің еңбек құқықтарын қорғау мен әлеуметтік жағдайларын жақсарту, өндірістегі қауіпсіздік мәселелері мен еңбек дау-дамайларын шешу, қайырымдылық, спортты дамыту, білім беру мен жастар саясатын жүргізу және басқа да салаларда оң нәтижелерге қол жеткізуге айтарлықтай үлесін қосып келеді.
Кәсіподақтың «Қазақстан темір жолы» ҰК» АҚ және оның еншілес ұйымдары, құрылымдық бөлімшелері басшылығымен өзара қарым-қатынасы тең құқылы әлеуметтік серіктестік қағидаттары негізінде құрылады.
«Қазкөліккәсіп» ҚБ 30 жылдық мерейтойын тек сөзбен емес, нақты істермен қарсы алуда. Оны біз күн сайынғы жұмыс барысында көріп, қоғамдық өмірдегі шаралар арқылы байқап отырмыз. Биыл мерейтой қарсаңында еліміздің түкпір-түкпірінде мәдени-бұқаралық, имидждік және спорттық шаралары мен қайырымдылық жұмыстары ауқымды көлемде өтуде. Теміржолшылардың мүддесі жолында тер төгіп жүрген барша кәсіподақ қызметкерлерін мерейтоймен құттықтап, мықты денсаулық, еңбекте береке мен толағай табыс тілеймін!
Нұрлан САУРАНБАЕВ, «ҚТЖ»ҰК» АҚ Басқарма төрағасы