Маңғыстаулық теміржолшы «100 жас есім» жобасында топ жарды

Тарих қойнауына еніп бара жатқан барыс жылы маңғыстаулық жас теміржолшы Асхат Шарапатдинов үшін табысты болды. Ол биыл  «ҚТЖ» компаниясының «100 жас есім» жобасы қатарынан орын алды. Ол ол ма, Мұнайлы ауданында өткен «Жыл үздігі-2022» байқауында «Үздік жас теміржолшы» жастар сыйлығының номинанты атанды.      

Асхат жаз айынан желтоқсанға дейін жалғасқан  «100 жас есім» жобасының барлық сатысынан сүрінбей өтіп, топ жарған 100 жастың бірі  болғаны аймақ теміржолшыларының да мерейін көтеріп тастады. Ал аудандық байқауда ол үздік он бір аталымның біріне лайық деп табылып, аудан әкімі Ержан Күмысқалиевтің  қолынан сыйлық алды.  

- Ата жолын жалғастырып, мамандық таңдауда жаңылысқан жоқпын. Туған атам өмір бойы әскерилендірілген теміржол күзетінде еңбек еткен. Баласы өмірде қандай жетістікке жетпесін ата-ана үшін содан артық сый жоқ. Менің  бұл марапаттарым сол кісілерге жаңажылдық тартуым, болашаққа жоспарым, алыдма қойған мақсатым бар, соған жеткенше тыным тапапйтын боламын,-  дейді Маңғыстау қосалқы бөлімі өндірістік-техникалық бөлімде инженер Асхат Шарапатдинов.  

Жастар сыйлығының лауреаты атанған Асхат түбек теміржолындағы еңбек жолын Еуразия ұлттық университетін "Тасымалдау, қозғалысты ұйымдастыру және көлікті пайдалану"  мамандығы бойынша бітіріп келгеннен кейін 2015 жылы Боржақты бекетінде станция кезекшісі болып бастады. 2017-2018 жылдары Маңғыстау станциясында пойыз құрастырушы және техникалық бөлімде қозғалыс қауіпсізігі бойынша бас маман міндетін атқарады. 2018-2022 жылдары Маңғыстау бөлімшесінде қозғалыс қауіпсіздігі бойынша бас маман болса,  биылғы жаз техникалық бөлімге ауысты.    

Орда бұзар отызға енді толғалы отырған жас маман  бүгінгі жетістігімен тоқтап қалмасы анық,  қоян жылынан да күтері көп. Теміржолшылар әулетінен шыққан жары Жанармен бірге  бүгінде бір бала өсіріп отырған жас отбасы иесі барша әріпетестерін жаңа жылмен құттықтап, еңбекте табыс, отбасына бақыт тілейді.