Әлеуметтік жобаға қолдау көрсетілуде
Абай облысы бойынша меншікті тілші
Соңғы жылдары еліміз бойынша әлеуметтік кәсіпкерлікке кеңінен қолдау көрсетілуде. Аталмыш бағыттағы игілікті шараларды «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қоры іске асыруда.
Тоқтала кетсек, «Табысты отбасы» жобасы аз қамтылған отбасыларға, көп балалы аналарға, ерекше қажеттіліктері бар балаларды тәрбиелеп отырған отбасыларға және бір бала тәрбиелеп отырған әкелер мен аналарға көмек көрсетуге арналған. Басты мақсаты - сұранысқа ие мамандықтар бойынша оқыту және шағын гранттық қолдау көрсету арқылы тұрғындардың әл-ауқатын арттыру. Бұл ретте Ұлытау облысында гранттар 14 түлекке, Жетісу облысында 24 қатысушыға беріліпті. Ал, Семейде аталмыш әлеуметтік жобаның тағы 29 түлегі арнайы құрал-жабдықтар иегері атанды.
Осы орайда Семейде «Табысты отбасы» әлеуметтік жобасының қатысушыларына арнайы жабдықтар жиынтығы салтанатты түрде табыс етілді. Аталмыш шараға Семей ЖТ бөлімшесінің бастығы Владимир Бабиченко, «Самұрық-Қазына» АҚ компаниялар тобы мен атқарушы билік өкілдері қатысты.
Жиын барысында сөз алғандар әр аймақтағы тұрғындардың өмір сүру сапасын жақсартуға және өңірлерді дамытуға бағытталған жобалардың нәтижелі боларына сенім білдірді. Бұл орайда Семей ЖТ бөлімшесінің басшысы Владимир Владимирович жоба қатысушыларына құттықтау лебізін арнады.
– Баршаңызды осынау бірегей жобаға қатысып, гранттық қолдауға ие болуларыңызбен құттықтаймын. Өз заманында Абай да замандастарын белгілі бір кәсіп игеріп, еңбек адамы болуға үндеген болатын. Бұл өсиет бүгінгі күні де өз маңызын жойған жоқ, – деді өз сөзінде бөлімше басшысы.
Басқосу барысында сонымен қатар, «Samruk-Kazyna Trust» әлеуметтік жобаларды дамыту қорының бас директорының орынбасары Серғожа Қалиасқаров та пікір білдірді.
Жиында «Табысты отбасы» жобасының авторы Айжани Нұрланова да сөз алып, аталған бағытта жүргізілген жұмыстар жайлы сөз етті. Сонымен қатар, жобаға белсенді түрде қатысып, кәсіптің жаңа түрін меңгеруге ерекше ден қойған қатысушыларға да алғысын білдірді. Айжани Адайқызы айтып өткендей, олардың барлығы бейіндік оқыту, тәлімгерлік қолдау, жеке тұлғалық даму және бизнес-дағдыларды дамыту бойынша арнайы тренингтерден өтіп, жаттықтырушылар мен тәлімгерлердің барлық нұсқауларын орындап шығыпты.
Айта кетер болсақ, Абай облысынан жобаның 29 қатысушысы өз ісін ашу үшін жабдықтар түріндегі гранттар алды. Оларға ноутбуктер, тігін машиналары, пештер, миксерлер, кушеткалар және мультимарка сканері тарту етілді. Жоба шеңберінде кешенді оқыту бес бейіндік бағыт бойынша жүргізіліп, қатысушылар «ЅММ», «Кондитерлік іс», «Сұлулық индустриясы», «Тігін ісі» және «Автоэлектриктер» мамандығын меңгерген-ді.
– «Табысты Отбасы» әлеуметтік жобасының пилоты өткен жылдың 1 желтоқсанында Абай, Жетісу, Ұлытау өңірлерінде, сондай-ақ Түркістан және Ақтөбе облыстарында басталған болатын. Жоба «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қорының кешенді қолдауымен жүзеге асырылуда. Аталған бағыттағы шаралар алдағы уақытта оң нәтиже берері анық, – дейді бұл орайда Семей ЖТ бөлімшесі бастығының экономика және қаржы бойынша орынбасары Жанар Құрманғалиева.
Басқосу соңында барлық грант иегерлеріне арнайы сертификаттар салтанатты түрде табыс етілді.