Теміржолшыларды толғандырған мәселелер тыңдалды

Маңғыстау темір жолында әлеуметтік салаға қатысты құзырлы өкілдер шалғай станцияларды аралап, теміржолшылардың жұмыс орындарында кездесулер өткізіп, олардың сұрақтары мен ұсыныстарын тыңдады.

Аталған басқосуларда Маңғыстау қосалқы бөлімі кәсіподақ ұйымының төрағасы Әзірбай Тұрмағанбетов, қосалқы бөлім бастығының экономика жөніндегі орынбасары Рану Сарбулатова, кадр бөлімінің басшысы Екпін Қожахметов теміржолшылардың әлеуметтік хал-ахуалымен танысып, жаңалықтар мен өзгерістерден хабардар етті.  

Алдымен Бейнеу станциясында басталған басқосуға станцияның, вагон пайдалану және локомотив айналым деполарының ұжымы қатысты. Сосын Сай-Өтес, Шетпе станциялары мен оларға жақын маңдағы бекеттердің теміржолшыларын жинады. Бейнеуден кейінгі бағыт Өзен-Болашақ телімінде жалғасты. Өзен, Болашақ, Бопай станциялары мен Ақбөбек, Бастау және осы телімдегі кішігірім бекет жұмысшыларының әлеуметтік мұңмұқтажы тыңдалды. Теміржолшылар ұжымдық шарттағы қосымша өзгерістер мен енгізіліп жатқан және алдағы уақытта жүзеге асырылатын жаңалықтармен танысты. Дәл осындай кездесулер Маңғыстау станциясында да ұйымдастырылып, ондағы екі депоның ұжымы мен басқа да жұмысшылар қатысты.  

– Біздің бұл сапарымыздың мақсаты жұмысшыларды толғандырған әлеуметтік мәселелер туралы біліп, олардың игілігі үшін жасалып жатқан өзгерістерді таныстыру болды. Кейінгі кездерде еңбекақы тарифінің көтеріліп жатқаны, алдағы наурызда тағы да 10 пайызға жоғарылайтыны, жұмыс көлемін дұрыс орындаған өндірістегі жұмысшыларға сыйақы тағайындалатыны, тағы басқа да ақпараттар жеткізілді. Мысалы, келесі жылы жаңа ұжымдық шарт жарық көреді, көп жұмысшылардың соған қатысты сұрақтары бар екен. Одан басқа бұрыннан көтеріліп жүрген мәселелер де қозғалып, кәсіби мерекедегі сыйақы мөлшерін, балалы болғанда берілетін біржолғы жәрдемақыны көтеру бойынша ұсыныстар айтылды. Медициналық қызмет бойынша «Медикер» қызметіне көңілі толмайтындар бірнеше кездесуде қайталанды. Зейнет жасы туралы, жеке басының мәселелерін алға тартқандар да кездесті. Көбісі алдағы уақытта іске асырылғалы отырған – шипажайды өздері таңдау мүмкіндігіне қызықты. Бұл да жұмыс берушінің теміржолшылар үшін қолға алып отырған жақсы жаңалықтарының бірі, енді бұрынғыдай белгілі бір шипажайларда ғана емес, әркім өзі қалаған жерінде демала алады. Оның белгілі бір мөлшерін өтеп беру қарастырылған, – дейді Маңғыстау қосалқы бөлімі кәсіподақ ұйымының төрағасы Әзірбай Тұрмағанбетов.