Маңғыстау станциясында сала ардагерлеріне құрмет көрсетілді
Маңғыстау облысы бойынша меншікті тілші
Қарттарын қадірлеген халқымыз қариясын қазынасына балап, қашанда төрге оздырған. Жақында өткен халықаралық қарттар күніне орай Маңғыстау станциясында сала ардагерлеріне құрмет көрсетіп, батасын алған шара өтті.
Кәсіподақтың мұрындық болуымен ұйымдастырылған басқосуға екі жүзден астам ардагер жиналды. Көптен бас қоспаған қариялар бір-бірін көргеніне қуанып, емен-жарқын әңгіме-дүкен құрысып, шер тарқатысып, арқа-жарқа болды. Алыс-жақыннан жиылған осынау аяулы жандар замандас, дос-жарандарымен бірге көрікті мейрамханадағы мерекелік дастарханнан дәм татып, өздеріне арнайы дайындалған концерттік бағдарламаны тамашалады. Естеліктер айтып, өнегелі әңгіме шертті. Өңір теміржолының өткені мен бүгіні де сөз болды.
Қонақтарды Маңғыстау қосалқы бөлімі бастығы Нәжімеден Ғұбашов, Маңғыстау магистральдық желі бөлімшесі директоры Мұхтар Бақтыгереев, орталық теміржолшылар кәсіби одағының Маңғыстаудағы өкілі Сәрсенбай Есенқұлов, қосалқы бөлім кәсіподағының төрағасы Әзірбай Тұрмағанбетов және басқа да кісілер атаулы күнмен құттықтап, дендеріне саулық тіледі. Ардагерлердің Маңғыстау теміржолына қосқан үлесі туралы айтып, еңбегіне алғыс білдірді. – «Қариялы ел – қазыналы ел» деп бекер айтқан ба?! Ақсақалдарымыз бен ақжаулықтыларымыз қатарлас, құрбылас, әріптес болған жандармен дидарласып, бүгін бір жасап қалды. Ал біз олардың әңгімесін тыңдап, батасын алдық. Бұл кісілердің ризашылығына бөленіп, өмірлік тәжірибесінен ғибрат алудың өзі бізге бір ғанибет, Қарттарымыз бақуатты өмір сүріп, аман-сау жүргей, – дейді орталық теміржолшылар кәсіби одағының маңғыстаудағы өкілі Сәрсенбай Есенқұлов.
