Жол айрық тұрғындары ауызсуға қол жеткізді

Семей ЖТ бөлімшесі бойынша теміржолшылардың әлеуметтік мәселелерін шешу алдыңғы кезекте тұр. Осы орайда желі бойындағы теміржолшылар шоғырланған шағын елді мекендерді сапалы ауызсумен қамту әлі де маңызды әрі стратегиялық мәнге ие.

Бүгінгі таңда Семей ЖТ бөлімшесіне қарасты барлық станцияларға «Теміржолсу-Аягөз» ЖШС тұрақты қызмет көрсетуде. Осы саланың білікті маманы Бауыржан Үмбетов басқаратын ұжымның соңғы жылдардағы жетістіктері көп. Осыған дейін Ақтоғай-Аягөз-Жарма телімдері арасындағы шағын жол айрықтарындағы су беру нысандары күрделі жөндеуден өтсе, №9 жол айрығы, Таңсық, Балықтыкөл сынды бірқатар станцияларда су тұщытатын «Таза су» құрылғысы пайдалануға берілді. Олардың барлығы да бүгінде толықтай техникалық талаптарға сай жұмыс істеп тұр.  

Міне, теміржолшылар игілігі үшін атқарылып жатқан жұмыстар қатары жуырда тағы бір нысанмен толығып, Ақтоғай-Аягөз телімі аралығындағы №21 жол айрығының тұрғындары үшін жағымды жаңалық орын алды. «Теміржолсу-Аягөз» ЖШС және НЖС-6 теміржолшыларының күш салуымен бұрғылау жұмыстары жүргізіліп, ауыз суға қол жеткізілді. Ендігі аралықта таза су мұнда еңбек ететін жолшылар мен қозғалысшылар үшін тасымал болмайды. Шөлейтті даланың ортасынан тіршілік нәрінің жаңадан көзі пайда болды.  

Жол айрығының барша тұрғындары осынау игілікті іс үшін бөлімше мен «Теміржолсу-Аягөз» басшылығымен қоса осы шараға атсалысқан ПЧ-42 жолшыларына алғыс жаудыруда. Ауызсудың келуімен бұл жерден көшіп кеткен тұрғындар қайта оралып, мұндағы тіршілік те қайта жанданады деген үміт мол.