Өнерлі өрендер байқауы (Фото)
"Қазақстан теміржолшысы" газетінің Жамбыл облысындағы меншікті тілшісі
Жамбыл жүк тасымалы бөлімшесінде 1 маусым – Халықаралық балаларды қорғау күніне орай жас әншілер мен бишілер байқауы өтті.
Байқауға бөлімшеге қарасты мекемелер қызметкерлерінің балалары қатысып, жарты күнге созылған жас өнерпаздар байқауының жеңімпаздарын кәсіподақ ұйымы арнайы дипломдармен марапаттап, сыйлықтар тапсырды.
– Байқауға қатысуға 6-13 жас аралығындағы үміткерлерден өтінімдер қабылданды. Теміржолшылардың балалары бұл күнді асыға күтті, жарысқа үлкен дайындықпен келіпті. Үздіктерді анықтау да оңайға соққан жоқ, – дейді кадрлар бөлімінің басшысы Меруерт Баймұрзаева.
Балаларға шаттық сыйлаған мерекелік іс-шара мұнымен шектелген жоқ. Түстен кейін балалар Тараз қаласындағы Т.Рысқұлов атындағы орталық саябаққа саяхат жасады. Кәсіподақ ұйымы жас жеткіншектерге аттракциондарға тегін билет сыйлап, балмұздақ таратқан.
Ал Жамбыл локомотив депосы қызметкерлерінің балалары үшін мереке 100 жылдық тарихы бар депо музейінен басталды.
– Локомотив пайдалану депосына экскурсия жасаған балалар әкелері, аталары еңбек еткен жерді көру балаларға қызық болды. Депо тарихымен танысып, аралап көріп, машинистер мен көмекшілерінің есімдері жазылған тақтадан «менің әкемнің есімі неге жазылмаған» деп аты-жөнін іздеп таласқандар болды, – дейді жеткіншектерге экскурсия жүргізген депо қызметкері Гүлвира Нұрабаева.
Бұдан соң балалар клубта өткізілген суретшілер жарысына қатысты.
Ең үздік сурет авторларына самокаттар мен балаларға арналған жол сөмкелері тапсырылды. Өз өнерлерін көрсеткен жеткіншектер де сыйлықсыз қалған жоқ.
