Балалар жазы көңілді
Абай облысы бойынша меншікті тілші
Семей теміржолшыларының мектеп жасындағы балаларының жазғы демалысын сауықтыру лагерьлерінде өткізуді ұйымдастыру ісі биыл нәтижелі өтуде.
Жуырда әлеуметтік пакет шеңберіндегі іс-шаралардың бірі ретінде бөлімше қызметкерлерінің балалары «Кристалл» сауықтыру орталығына аттанды. Демалыс базасында мектеп жасындағы оқушылардың денсаулықтарын нығайтып, уақыттарын мейлінше тиімді өткізулері үшін барлық қолайлы жағдай толық қарастырылған. Қауіпсіздік, теңгерімді тамақтану және демалыс уақыттарын дұрыс ұйымдастыруға ерекше көңіл бөлінген. Қызғылықты спорттық сайыстарға да орын берілген. Бүгінде желі бойынан жиналған 98 балақай 10 күн бойы жаз қызығын осында өткізіп жатыр.
– Биылғы балалар лагерін ұйымдастыру 10-шы маусымда басталған еді. Содан бергі аралықта 7 жастан 14 жас аралығындағы балақайлар жазғы каникулды тиімді өткізуде. Балаларды Алматы маңындағы «Пионер» отбасылық демалыс шипажайына жіберудеміз. Соңғы лек бойынша тағы 30 балақай 12-шы тамызда оңтүстік астанаға пойызбен аттанбақ. Ал, Семейден 40 шақырым жердегі «Кристаллл» сауықтыру орталығында жуырда тағы 100 баламыз демалып қайтатын болады, – дейді бұл орайда аталмыш шараларды ұйымдастырушы НОД-ЖТ кәсіподақ ұйымының төрайымы Айгүл Мырзағалиқызы.
Балаларды Семей станциясының кәсіподақ төрайымы Шәрбат Мейірманова бастаған қызметкерлер бастап апаруда. Қауіпсіздік шаралары толықтай қамтамасыз етілген. Арнайы дәрігер де бекітілген. Жазғы лагерлерді ұйымдастыру ісі бөлімше басшысы Алмас Сейсемқановтың тікелей қадағалауында тұрғанын да айта кету керек.