Теміржол саласының әйелдер кеңесі өтті

«ҚТЖ-Жүк тасымалы» ЖШС-де теміржол саласының әйелдер кеңесі өтті. Теміржолда гендерлік саясатты іске асыруға көмектесу мақсатында жуырда құрылған кеңестің алғашқы отырысына барлық өңірден келген белсенді әйел қызметкерлер қатысты.

Жиынға қатысушылар алдында сөз сөйлеген «ҚТЖ» ҰК» АҚ аппарат басшысы Серік Кеулімжаев нәзік жандарды кеңестің алғашқы отырысымен құттықтап, жұмысына сәттілік тіледі. Келесі сөз кезегін алған кеңес төрайымы, «ҚТЖ-Жүк тасымалы» ЖШС бас директорының экономика және қаржы жөніндегі орынбасары Шолпан Омарбекова кеңестің, негізгі міндеттер мен жалпы ережелер туралы баяндады.  

– Мемлекет басшысы қоғамның барлық саласында әйелдердің рөлін арттыруға ерекше назар аударып отыр. Соған сай теміржол саласында да әйел қызметкерлердің кәсіби және мансаптық өсуіне жағдай жасалады. Олардың көшбасшылық қасиеттері мен дағдыларын дамыту үшін бағдарламалар әзірленеді, тренингтер, семинарлар өткізіліп, білім беру бағдарламалары іске асырылады. Сондай қадамдардың бірі осы Әйелдер кеңесі арқылы теміржолда олардың мүмкіндіктерін арттыру үшін қаржыландыру, инвестициялау тетіктері қарастырылады. Нәзік жандардың құқықтары мен мүдделерін қорғауға басымдық беріледі. Көшбасшылық қасиеттері бар әйелдерді анықтап, олардың тұлғалық өсуіне қолдау көрсетіледі, оларды тиімді қолдау мен дамытудың қазіргі заманғы механизмдері әзірленеді, – деді Ш.Омарбекова.  

Бүгінде аталған кеңеске серіктестіктің 40 әйел-қызметкері мүше. Оның 54 пайызын 45 жастан жоғары әйелдер құраса, 34 пайызы 35-45 жастағылар, ал 12 пайызы 25-35 жас аралығындағы әйелдер. Отырыста кеңес жұмысының жоспары мен құрамы бекітілді және жұмысты дамыту бойынша ұсыныстар айтылды. Жоспарға сәйкес әр тоқсан сайын кеңес отырысын онлайн және оффлайн форматта өткізу, өңірлік өкілдермен бірге бейнеконференция, кеңестің көшпелі отырыстарын ұйымдастыру, әлеуметтік сауалнама жүргізу, құқықтық реттеуді жетілдіру бойынша ұсыныстар әзірлеу көзделген. Ал 2-3 тоқсанда «Әйелдер мен балаларға қатысты зорлық-зомбылыққа мүлдем төзбеушілік» акциясын өткізу, 3-4 тоқсанда басқарушылық құзыретті дамыту тренингтерін, үздік мансаптық өсу тәжірибелері бойынша семинар өткізу жоспарланған. Желтоқсан айында теміржол саласы әйелдерінің форумын өткізу, тамызда «Мектепке жол» акциясын ұйымдастыру көзделіп отыр. Сонымен бірге әйелдер арасында озық кәсіби жетістіктер бойынша байқау, «Әйелдердің шығармашылық әлемі» көрмесін өткізіп, салада Кеңес әйелдері жүзеге асырған табысты жобаларға шолу жүргізу де осы жоспар аясында іске асырылады.  

Отырыс барысында ел теміржолының түкпір-түкпірінен келген теміржолшы әйелдер өздерін және еңбек жолын жеке-жеке таныстырды. Олардың көпшілігі – салада 20-30 жылдық тәжірибесі бар тәжірибелі көшбасшы әйелдер.