Жұмысшы мамандарға сұраныс бар
«Қазақстан теміржолшысы» газетінің тілшісі
Биыл Президенттің жарлығымен Жұмысшы мамандықтар жылы деп жарияланғаны белгілі. Бұл елдегі ең ірі жұмыс беруші компанияның бірі ретінде ҚТЖ үшін өте маңызды. Жүз мыңдаған адам еңбек ететін компанияда жұмысшы мамандарға деген зәрулік әлі де бар.
Бұл туралы «ҚТЖ» ҰК» АҚ Магистральдық желі дирекциясы филиалы директорының инфрақұрылымдық даму және қауіпсіздікті қамтамасыз ету жөніндегі орынбасары Әнуар Амантаев «Магистраль Live» алаңында пікір білдірді.
Айтуынша, дирекцияда бүгінде 44 мыңға жуық адам еңбек етеді. Алайда жыл сайын шамамен 1000 жұмыс орны ашылуда екен.
– Бұрын темір жолда жұмысшы мамандықтары бойынша жұмысқа тұруда бәсекелестік жоғары еді. Қазір жастар техникалық және жұмысшы мамандықтарын аз таңдайды. Бұл білім беру жүйесінің ерекшелігіне байланысты деп санаймын, себебі жас мамандарды ынталандыру жағы кемшін түсіп тұр, – дейді ол.
Айта кету керек, ҚТЖ осы ретте оқу орындарымен ынтымақтастығын арттырып, түлектердің компанияға жұмысқа тұруына көмектесіп отыр. 2024 жылы 15 жас маман жұмысқа орналастырылды. Алайда бұл аздық етеді. Алдағы уақытта компанияның жүзеге асыратын ауқымды жобалары бар. Оның ішінде 5 мың км жаңа теміржол салу жоспарланған. Бұл осы салаға жұмысшы мамандарды көптеп тартуды қажет етеді.
– ҚТЖ өте сенімді және әлеуметтік жауапкершілігі жоғары жұмыс беруші. Компанияда жұмысшыларға барлық еңбек және әлеуметтік жағдай жасалған. Жалақы мен әлеуметтік пакет жыл сайын өсіп отырады. Санитарлық-тұрмыстық жағдайды жақсартуға ерекше көңіл бөлінеді. Сол үшін арнайы бағдарлама жүзеге асырылады. Оның бюджеті де ұлғая түскен. Темір жол – бұл тек тасымалдаушы сала емес, бұл тұрақтылық пен ұзақ мерзімді перспективаны қамтамасыз ететін, қарқынды дамушы сала. ҚТЖ-да тұтас бір еңбек әулеттері қызмет етеді, бұл компанияның елдегі жетекші жұмыс беруші ретіндегі жоғары мәртебесін айғақтайды, сондықтан жастарды теміржолға жұмыс істеуге шақырамыз, – дейді Ә.Амантаев.