Әрқашан күн сөнбесін...

Халықаралық балаларды қорғау күні қарсаңында ҚТЖ бас ғимаратында теміржолшылардың балаларына арнап мерекелік іс-шара ұйымдастырылды.

Еvent мерекелік іс-шаралар академиясы өткізген мерекелік думан жоғары деңгейде ұйымдастырылды. Бұл күні балалар би билеп, ән айтты, түрлі аттракциондарда ойнап, қызықты, танымал кино және мультфильм кейіпкерлері болып киінген аниматорлармен суретке түсті. Сиқыршылар өнерін тамашалап, өздері сурет салды және аквагрим салушыларға беттеріне түрлі суреттер салғызды. Жас талантты өнерпаздардың концертін көріп, сабынды көбікпен ойнады. Балалар үшін батут, сумо, армрестлинг ұйымдастырылды. Картон қағаздан үйшіктер жасау, мольбертке сурет салу, өсімдік көшеттерін отырғызу, ерекше картиналар жасау бойынша шеберлік сабақтары да балалардың 3 сағат ішінде уақытын демалып та пайдалы өткізуіне мүмкіндік берді. Бір айта кетерлігі, іс-шараны жүргізушілер мерекені қазақ және орыс тілдерінде бірдей өткізуге мән берді.  

– Биылғы мерекелік іс-шара бұрынғыдан да ерекше ұйымдастырылды. Мен де балаларымды, яғни Арайлым, Дияр, Аяулым есімді үш баламды апарып қатыстырдым. Бағдарламасы өте қызықты болды. Барлық жанр қамтылған. Бала – біздің болашағымыз, ел ертеңі. Балалық шағы бақытты өткен балалар ғана ертең мықты, қамқор, жанашыр болып өседі. Сондықтан ата-ана ретінде біз олардың жарқын өміріне жол салу үшін осындай әдемі, әсерлі сәттерді көбірек ұйымдастыруымыз керек. Осы ретте ҚТЖ компаниясына алғысым шексіз, – дейді «ҚТЖ» ҰК» АҚ Магистральдық желі дирекциясы Еңбек қауіпсіздігі және еңбекті қорғау, өнеркәсіптік қауіпсіздік және экология департаментінің менеджері Қуанышбек Қосымов.