Жыл басынан бері құқық бұзғаны үшін 400-ге жуық адам пойыздан түсірілген
Осы жылдың алғашқы жартыжылдығында Көліктегі полиция департаментінің қызметкерлері жедел-профилактикалық іс-шаралар нәтижесінде пойыздан әкімшілік заңнаманы бұзған 388 адамды түсірген, деп хабарлайды Rail-news.kz.
Көліктегі полиция департаментінің қызметкерлері жолаушылар пойыздарында құқықбұзушылықтардың жолын кесу бойынша белсенді жұмыс жүргізіп келеді. Басты ұстанымдары – Заң мен Тәртіп.
«Өткізілген рейдтік және жедел-профилактикалық іс-шаралар нәтижесінде пойыздардан еліміздің әкімшілік заңнамасын бұзған 388 адам түсірілді. Олардың басым бөлігін, яғни, 359-ын алкогольдік мас күйінде болған азаматтар құрады. Сонымен қатар, ұсақ бұзақылық – 13 және басқа да құқықбұзушылықтар тіркелді», - деп хабарлады Көліктегі полиция департаменті.
Мәселен, «Маңғыстау – Алматы» бағытындағы жолаушылар пойызы бастығының актісімен Бейнеу станциясындағы желілік полиция бөлімшесінің қызметкерлері Қызылорда облысының тұрғынын пойыздан түсірген. Ішімдікке сылқия тойған 31 жастағы ер адам полиция бөлмесіне жеткізу кезінде тәртіп сақшыларының заңды талаптарына қарсылық көрсеткен.
Тексеру барысында аталған азаматтың осыған ұқсас құқықбұзушылық үшін бір жыл ішінде бұған дейін де жауапкершілікке тартылғандығы анықталды, Бұл жолы құқықбұзушы бірден екі бап, атап айтқанда алкогольдік ішімдіктер ішу және қоғамдық орындарға масаң күйінде келу, сондай-ақ полиция қызметкерінің заңды талабына бағынбау бойынша жауапқа тартылған. Соттың шешімімен ол 4 тәулікке әкімшілік қамауға алынды.
Дәл осы бағыттағы пойызда тағы бір оқиға орын алды: Қызылорда облысының 41 жастағы тұрғыны мас күйінде вагон-мейрамханада ішімдік бермегені үшін сыра бокалымен терезені сындырған. Аталған азамат өз әрекеті үшін әкімшілік жауапкершілікке тартылды.