Берсең – балаға бер
Атырау облысы бойынша меншікті тілші
Қазір мектеп жасында балалары бар отбасылардың шаңырақтарында қызу қарбалас. Балаларға оқушы киімін алу, оқу құралдарын түгендеу, жаңарту, тағысын тағы қыруар тірлік. Осыған орай теміржол мекемелері де теміржолшы отбасыларына көмек ұйымдастыруда. Соның бірі – «Мектепке жол» жалпы республикалық қайырымдылық акциясы.
Оған Атырау жүк тасымалы және магистральдық желі бөлімшелері де белсенді атсалысып жатыр. «Қуантсаң – баланы қуант. Берсең – балаға бер» демекші, жыл сайын дәстүрлi түрде ұйымдастырылатын шара өңірде биыл да өткізілді. Акцияның мақсаты – көп балалары бар және аз қамтылған отбасыларға жаңа оқу жылына дайындық кезеңінде көмек көрсету және әлеуметтік себептер бойынша балалардың мектепке бармай қалуын болдырмау. Оның ішінде «Рюкзак» акциясы бойынша биыл НОД-13 – 8, ал НЖС бойынша 43 балаға дәптерден бастап қаламсап, қарындаш, бояу түрлері, сурет салғыш, т.б. оқу-құралдарына толы сөмке беріліпті. Сондай-ақ 2024-2026 жылдарға арналған ұжымдық шартқа сәйкес мектеп жасындағы 3 баласы бар ата-аналар мен мектепте 2 баласы оқитын жалғызбасты ата-анаға Атырау жүк тасымалы бөлімшесі бойынша барлығы 1234, магистральдық желі бойынша 931 оқушыға 4 АЕК көлемінде қаражат бөлініп, табыс етілген.
Сонымен қатар кәсіподақ тарапынан да аз қамтылған және көп балалы теміржолшылардың, оның ішінде вагонқұрастырушылар, жүк қабылдап-жөнелтушілер, операторлар мен тауар кассирлері, жолшылар, пойыз диспетчерлері, локомотившілер, т.б. қарапайым жұмысшылардың балаларына мектеп құралдары берілді. Ол НОД бойынша 65 бала болса, НЖС бойынша 157 бала. Оқу құралдарын алған балалардың қуанышында шек жоқ, тек сабағын жақсы оқыса, нұр үстіне нұр.