Жамбыл ЖТ бөлімшесі жаңа оқу жылына 347 балаға қолдау көрсетті


"Қазақстан теміржолшысы" газетінің Жамбыл облысындағы меншікті тілшісі
«ҚТЖ-Жүк тасымалы» ЖШС «Жамбыл ЖТ бөлімшесі» филиалындағы кәсіподақ ұйымы биылғы оқу жылында теміржолшылар отбасына арнап оқу құралдары салынған 347 рюкзак дайындады.
Осыған орай Жамбыл жол бөлімшесіне Тараздағы құрылымдық бөлімшелер қызметкерлері шақырылды. «Жамбыл ЖТ бөлімшесі» филиалының директоры Айдын Сеитбенбетов, «Қазкөліккәсіп» ҚБ Жамбыл облыстық филиалының төрағасы Ерболат Жидебаев, кадрлар бөлімінің бастығы Меруерт Баймұрзаева, Жамбыл бөлімшесі кәсіподақ ұйымының төрағасы Серік Наурызбаев әлеуметтік топқа енген отбасыларға жаңа сөмкелерді табыс етті.
– «ҚТЖ» ҰК» АҚ-ның бастамасымен жыл сайын жаңа оқу жылында теміржолшылар отбасындағы мектеп оқушыларына оқу құралдарымен бірге жаңа сөмке сыйлау дәстүрге айналған. Бүгінгі жас жеткіншек – ертең ел тірегі. Біз жас ұрпақтың сапалы білім алуы үшін барлық жағдайды жасауға тиіспіз. Биыл Жамбыл бөлімшесі әлеуметтік топтағы отбасылардың тізімін өткен жылмен салыстырған 55-ке дейін арттырдық. Бұл филиалға қарасты құрылымдық бөлімшелердегі қызметкерлердің 10 пайыздан астамын құрайды, – деді Айдын Пайзылдаұлы.
Сапалы сөмкелердің ішінде оқу құралдарының барлық түрі бар. Кәсіподақ ұйымының Жамбыл облыстық филиалының төрағасы Ерболат Жидебаевтың айтуынша, салалық бастауыш кәсіподақ ұйымдары 5 және одан асатын көп балалы отбасылар мен жалғызілікті аналардың тізімін жасаған.
Жалпы Жамбыл ЖТ бөлімшесі жыл сайын жаңа оқу жылының қарсаңында ұйымдастырылатын республикалық «Мектепке жол» акциясына да үн қосып, атсалысып тұрады. Жамбыл бөлімшесі кәсіподақ ұйымының төрағасы Серік Наурызбаев сөмкелер алдымен Жаңатас, Қаратау, Түлкібас, Сарышаған, Шу, Түрксіб секілді шалғайдағы құрылымдық бөлімшелерге таратылғанын жеткізді.