Жеті жүз балаға оқу құралы берілді
«Қазақстан теміржолшысы» газетінің тілшісі
2025-2026 жылдың жаңа оқу жылы да келіп жетті. Қазір еліміздің түкпір-түкпірінде балалар мектепке баруға қызу дайындалуда. Әсіресе мектепке тарыдай болып кіріп, он бір жылдан соң таудай болып шығатын бірінші сынып балақайларының толқуы мен қуанышында шек жоқ. Биыл Қазақстан бойынша 341 мың бала мектеп табалдырығын алғаш рет аттағалы отыр. Осыған орай «ҚТЖ» ҰК» АҚ жыл сайынғы «Балаларды мектепке дайындайық» қайырымдылық акциясын өткізуді биыл да жалғастыруда.
Биыл компания 3-5 класты шалғай станция, бекеттерде тұратын, көп балалы теміржолшылар отбасыларынан шыққан, бірінші сыныпқа баратын 700 оқушыны мектеп құрал-жабдықтарымен қамтамасыз етуде. Акция жаңа оқу жылының басында отбасыларды қолдау және бәріне тең жағдай жасауға бағытталған. Бұл оқу құралдарын теміржолшылар арасынан шыққан волонтерлер тиісті станция, бекеттерде тұратын отбасыларға жеткізуде. Оқушыларға қажет құралдар ішінде сөмке, дәптерлер, түрлі-түсті қарындаштар, сурет салатын альбомдар, қаламдар, желім, өшіргіштер, қылқалам және басқа да қажетті заттар бар.
– «Қазақстан темір жолы» ұлттық компаниясы үшін өз қызметкерлерінің әлеуметтік жағдайы қашан да маңызды. Бұған дейін республикалық «Мектепке жол» акциясына да қатысып келдік. Бұдан бөлек «Балаларды мектепке дайындайық» қайырымдылық іс-шарасына белсенді атсалысып келеміз. Бұл – «ҚТЖ» ҰК» АҚ-ның жыл сайынғы қайырымдылық бастамасы. Ол жұмысшылардың көп балалы отбасыларына, әсіресе шалғай аудандарда тұратындарға көмектесуге бағытталған. Акция аясында отбасыларға қажетті мектеп керек-жарақтары бар жиынтықтар беріледі. Теміржолшының әлеуметтік жағдайы дұрыс болса, қызметі де озық, еңбегі өнімді болады. Қазір барлық заттардың құны жоғарылап тұрған кезеңде бұл – көп балалы отбасылар үшін үлкен қолдау. Бұл – компанияның әлеуметтік саясатын жүргізу аясындағы жұмыстардың бір бөлігі ғана, – дейді «ҚТЖ» ҰК» АҚ Әлеуметтік саясат департаментінің бас менеджері Ақмарал Байғабылова.