Үздік еңбек әулеті
Маңғыстау облысы бойынша меншікті тілші
Түбек теміржолымен өмір жолы қатар өрілген Көктеубаевтар әулеті «Еңбек жолы» республикалық байқауының облыстық кезеңінде жеңіске жетіп, «Үздік еңбек әулеті» атанды.
Облыстық байқау қорытындысына сәйкес бірінші орынды иемденген Көктеубаевтар енді республикалық кезеңде бақ сынайды. Әулеттің саладағы жалпы еңбек өтілі – 252 жыл. Теміржолшылар династиясының бүгінде үшінші буыны теміржолда жұмыс істейді.
Түбек теміржолының іргесін қалаушылардың бірі Болат Көктеубаев пен жұбайы Қамқа Көктеубаевадан тараған бұл әулеттен бүгінге дейін 14 теміржолшы шыққан. Солардың бірі – бүгінде Маңғыстау станциясының парк кезекшісі Құндыз Сәмиева. Өрімдей жас кезінде, 1982 жылы темір жолға келген қаршадай қыз содан бері абыроймен еңбек етіп келеді. Соңғы жиырма жылдан бері станциядан Ақтау порты, Болашақ, Құрық, Жаңаөзен бағыттарына пойыздар жіберіп, тұйықтарға тапсыру сияқты маневрлік жұмыстарды атқарады.
Одан кейінгі буыннан жас болса да өз ортасына танылып үлгерген Маңғыстау жол дистанциясының бас инженері Марлен Көктеубаевты айта аламыз. Өзі жол монтері болып еңбек жолын бастаған дистанцияға бас-аяғы он-он бес жылда бас инженер болған ол жол бригадирі, жол шебері, еңбек қорғау инженері, Маңғыстау магистральдық желі бөлімшесінің техникалық бөлімінің инженері, жол бөлімінің инженері, басшысы болып, тәжірибе жинап үлгерген білімді азамат.
– Атам мен әжем 1967 жылы осы түбекте еңбек жолдарын бастаған екен. Содан бері теміржолшы біздің ата кәсібімізге айналды, – дейді Марлен.
Әсет Көктеубаев – Маңғыстау станциясындағы желілік полиция бөлімінде аға криминалист. Ол – қазір темір жолдағы қауіпсіздікті қадағалап, түрлі қылмысты ашу және алдын алу, болдырмау бағытында қызмет атқарып жүрген жас.
Еске сала кетсек, «Еңбек жолы» байқауы жыл сайын екі кезеңде – өңірлік және республикалық деңгейде үш номинация бойынша өткізіледі: «Үздік еңбек әулеттері»; «Жұмысшы жастардың үздік тәлімгері»; «Өндірістің үздік жас қызметкері». Көктеубаевтар «Үздік еңбек әулеттері» номинациясы бойынша жеңіске жетті.
Республикалық кезеңнің жеңімпаздарын ҚР Еңбек және халықты әлеуметтік қорғау министрлігі жанындағы республикалық комиссия анықтайды. Жеңімпаздарды марапаттау салтанаты Жұмысшы мамандықтар жылының жабылуына орай желтоқсан айында өткізіледі.