Адал еңбек өтеуі – алғыс

Қызылорда белгі беру және байланыс дистанциясының ұжымы  екі бірдей майталман теміржолшыны зейнетке шығарып салды. Әріптестерінің ыстық ықыласына бөленген қос ардагер де салаға  қырық жылын арнаған еңбек адамдары.  

Әбдірахман Сырғабаев бастаған ұжым кәсіподақ ұйымының  қолдауымен 41 жылдық еңбек өтілі бар КТСМ электромеханигі Б.Тұрман мен байланыс вагонының жолсерігі Б. Баратбековті лайықты сый-сияпатпен зейнетке шығарып салды.

  – Бүгінгі құрмет – адал еңбектің, маңдай тердің өтеуі. Әріптестеріміздің еселі еңбегі – жас мамандарға үлгі. Біз өз саламыздың өркендеуіне үлес қосқан осындай азаматтарымызбен әрдайым мақтанамыз, – деді кәсіподақ ұйымының төрайымы Ғалия Қожахметова.

Сондай-ақ салтанат барысында дистанцияның радиобайланыс электромеханигі М.Тұрдалиев пен СОБ электромеханигі З.Бакировты да ұжымдастары 60 жас мерейтойымен құттықтап, шапан жапты. Ал СОБ электромеханигі Ж.Жақсылықовты 50 жас мерейтойымен құттықтады. Бір-біріне жылы сөздері мен ізгі тілектерін арнап, әдемі естеліктерімен бөліскен әріптестер ерекше әсермен тарқасты.