Қызыққа толы каникул

«ҚТЖ» ҰК» АҚ және «Қазтеміржолкәсіп» ҚБ қолдауымен қысқы каникулда теміржолшылардың 70 жуық баласының Астанаға саяхаты ұйымдастырылып, олар төрт күн бойы елорданың түрлі көрнекі орындарын аралады.

Еліміздің барлық өңірінен келген 7-11 жас аралығындағы балалардың жол билеті, тамағы, қонақүйде жатуы, түрлі нысандарға қыдыруы, сыйлықтар алу және тағы басқа шығынын кәсіподақ ұйымы көтерді. Топтарға бөлінген балалар Астанада «Бәйтерек» монументіне, Ұлттық музейге, ҚТЖ бас ғимаратындағы музей мен Қысқы баққа, Мұхитаралға барды. Сонымен қатар қонақүй залында оларға түрлі шоу бағдарламалар ұйымдастырылды. Соңғы күнінде балаларға өз қолымен жаңажылдық сыйлықтар тарту еткен «Қазтеміржолкәсіп» ҚБ төрағасы Оразғали Ахметбаев оларды жаңа жылымен құттықтады.  

– Жылына 2 рет теміржолшылардың балаларын осылай Астанаға алдырып, демалысты ұйымдастыру дәстүрге айналған. Енді мұндай саяхат жазда басқа балалар үшін өткізіледі. Елорданың ең көрнекі орындарын аралатып, теміржол ғимаратымен таныстырамыз. Сіздерге бақытты балалық шақ тілеймін, сабақты жақсы оқып, ата-анаңыздың үмітін ақтаңыздар, – деді ол.

Жаңа Семей станциясының тасымал құжаттарын өңдеу операторы, әрі кәсіподақ өкілі Айнұр Ақшабарованың айтуынша, 4-7 қаңтар аралығында өтетін демалысқа өңірден 7 бала әкелген. Олардың бәрі де көп балалы отбасынан шыққан. Солардың бірі Дина Қайратқызы – семейлік машинистің қызы.  

– Үйде 5 баламыз, мен төртіншімін. Әкем көп жылдан бері ҚТЖ-да еңбек етеді. Астанаға үшінші рет келіп тұрмын, ал темір жол арқылы бірінші рет келуім. Қысқы каникулымыз өте қызықты өтіп жатыр. «Бәйтерекке» бардық, 105 метр биіктікке көтеріліп, суретке түстік. ҚТЖ музейінде түрлі қызықты ескі дүниелер бар екен, көне паровоздар, суреттер, басқа да жәдігерлер. Қонақ үйде біз пицца жасаудан шеберлік сабағына қатыстық, демалысымды осылай қызықты өткізуіме мүмкіндік берген әкемнің ұжымына, ҚТЖ-ға алғыс білдіремін, – деді Дина.