Әлеуметтік әріптес
«Қазақстан теміржолшысы» газетінің тілшісі
Құрылғанына 45 жыл болған Павлодар қаласындағы Жоғары электроника және коммуникация колледжі осы уақыт аралығында теміржол саласы үшін өндіріске 10 мыңнан астам орта буын мамандар дайындаған.
Олар – локомотив, вагон шаруашылықтары, тасымалдауды ұйымдастыру, сигнал беру, орталықтандыру және бұғаттау жүйесі, сондай-ақ жол құрылысы мамандары. Ал Павлодар магистральдық желі бөлімшесі колледж студенттеріне теміржол бейіні бойынша қамқоршы ұйым ретінде бас әлеуметтік әріптес болып отыр.
Балалар үйінің 8-9 сынып оқушыларын әлеуметтік қолдауға бағытталған «Samruk Úmiti» жобасы шеңберінде аталған колледжде ата-анасынан айрылған жетім балалар да оқиды. Мамандық алып шыққан соң олар «Samruk-Kazyna» портфельдік компанияларына жұмысқа орналасумен қамтамасыз етілмек.
– «Samruk Úmiti» жобасы аясында әлеуметтік бастама іске асырылып отыр. Осы жоба аясында Павлодар магистральдық желі бөлімшесінің қызметкерлері балалар үйінің тәрбиеленушілеріне тәлімгер ретінде бекітіліп, оларға мамандыққа бейімделуге көмектеседі.
Мақсат – жетім балаларға кәсіби бағдар беріп, мамандық таңдауға және әрі қарай тәуелсіз өмір сүруге көмектесу. Жасөспірімдерге кәсіптік бағдар беру мен мансаптық кеңес беруден бастап колледжге түсу немесе одан әрі жұмысқа орналасу кезінде практикалық дайындық пен қолдауға дейін сүйемелдеу жасалады, – дейді Павлодар магистральдық желі бөлімшесінің директоры Болат Баймағамбетов.