ҚТЖ: отандық өндірушілерді қолдайды

«Қазақстан темір жолы» ҰК» АҚ-да «Отандық тауар өндірушілерді «ҚТЖ» ҰК» АҚ компаниялар тобының сатып алуларына тарту: проблемалар, тетіктері және оларды шешу жолдары» тақырыбында дөңгелек үстел форматында жұмыс кездесуі өтті.

Дөңгелек үстел барысында ҚР Өнеркәсіп және құрылыс министрлігінің, «QazIndustry» Қазақстандық индустрия және экспорт орталығы» АҚ-ның, «Атамекен» ұлттық кәсіпкерлер палатасы, «Қазақстан машина жасаушылары одағы» заңды тұлғалар одағы, «Самұрық-Қазына Контракт» ЖШС-ның және «QazCloud» ЖШС-ның өкілдері отандық тауар өндірушілерге қолдау көрсету тетіктері мен құралдарын таныстырды. Отандық өндірушілермен ұзақ мерзімді ынтымақтастық пен жергілікті өндірісті дамыту мәселелерін талқылады. Сатып алу рәсімдерін жетілдіруге, цифрлық интеграцияға және жергілікті өндірісті ынталандыруға ерекше назар аударылды. Бұл бағыттар отандық бизнестің «Қазақстан темір жолы» ҰК» АҚ компаниялар тобының сатып алуларына қатысу мүмкіндігін кеңейтуге бағытталған.  

Қазақстандық кәсіпорындарды қолдау және отандық өндірісті дамыту – ҚТЖ қызметінің басым бағыттарының бірі. Сатып алудағы жергілікті қамту үлесін арттыру тек нормативтік талаптарды орындау ғана емес, сонымен қатар елдің экономикалық тұрақтылығын қамтамасыз етуге қосылатын стратегиялық үлес ретінде қарастырылуда. Биылдың өзінде отандық тауар өндірушілермен 1 029 жылдық келісімшарт жасалған.  

– ҚТЖ қазіргі уақытта Одақ мүшелерімен инженерлік өнімдерді, мысалы дөңгелек жиынтықтарын, бағыттауыш бұрмаларды, тежегіштер мен басқа да өнімдерді сатып алу бойынша ынтымақтастыққа елеулі қызығушылық танытуда. ҚТЖ-ның еншілес компаниялары жүзеге асыратын сатып алу процестеріне отандық тауар өндірушілерді кеңінен тарту мақсатында, биыл сәуір айында біз «Жаңа өндірістік қуаттарды құруды қолдау бағдарламасы» аясында импортты алмастыратын жаңа өнімдерді әзірлеу жобаларын жүзеге асыруға және инженерлік өнімдерді сатып алу бойынша алдын ала сатып алу келісімшарттарын жасауға бағытталған ынтымақтастық меморандумына қол қойдық, – деп атап өтті «Қазақстан машина жасаушылары одағы» ЗТО-ның атқарушы директоры Талғат Базарбеков.  

ҚТЖ тұрақты әрі ұзақ мерзімді серіктестікке айрықша мән беріп отыр. Бүгінде отандық тауар өндірушілермен 112 келісімшарт қолданыста болса, сонымен қатар жаңа отандық өндірістерді құруға және дамытуға бағытталған офтейк-келісімшарттар тетігі белсенді қолданылуда. Биыл 5 офтейк-келісімшарт жасалған. Ал 4 ұзақ мерзімді құжат қолданыста екен.  

Ашық диалог барысында қатысушылар жергілікті бизнестің сатып алу процестеріне белсендірек қатысуына кедергі келтіретін негізгі мәселелерді талқылап, оларды шешу жолдарын айқындады. Дөңгелек үстел қорытындысы бойынша тараптар отандық тауар өндірушілерді қолдау шараларын жетілдіру, жаңа өндірістерді құруға қолайлы жағдай жасау және сатып алынатын отандық тауарлардың номенклатурасын кеңейту бағытындағы бірлескен жұмысты жалғастыруға уағдаласты.