300-ден астам маска тігіп, теміржолшыларға тегін таратты

Достық станциясының жетекші инженері Жазира Қажытаеваның теміржолдағы қызметінен бөлек сүйікті ісі – тігіншілік. Бос уақытында көрпе, жастық тігумен айналысады. Елімізде төтенше жағдай орнап, халық жаппай маска сатып алуға көшкенде ол осы өнерімен қайырымды іс жасауға ниет етті.

Жазира ыңғайлы мата сатып алып, үйдегі тігін машинасымен 300-ден астам маска тігіп, станция жұмысшыларына таратты.

– Қолыңнан келіп тұрса, құдай берген өнерді неге игілікті іске жұмсамасқа?! Оның үстіне ел дәріханалардан маска таппай, әуресарсаңға түсті. Соны көріп отырып қарап қала алмадым, адамдардың алғысы маған жігер беріп, қанаттандыра түсті, – дейді Жазира.

Шығыс Қазақстан өңірінің Таскескен деген ауылында дүниеге келген Жазираның мамандығы – қаржыгер. Теміржолдағы қызметін 2013 жылы осы станцияда тауар кассирі болып бастаған. Үш жылдан кейін бірінші санатты экономист болып еңбек етсе, екі жылдан бері өндірісті қамтамасыз ету жөніндегі жетекші инженер қызметінде.

– Теміржолдағы жұмысым өзіме қатты ұнайды. Өте қызық. Негізінен «Самұрық-Қазына» қорымен жұмыс жүргіземіз. Станцияға керекті тауарлар, қызметтер туралы тендер өткіземіз. Тендер ұтып алған жеткізушілермен келісімшартқа отырамыз. Барлық тауар, қызмет, жұмыс бойынша келісімшартта көрсетілген міндеттердің уақытында орындалуын қадағалаймыз. Ақшаның мерзімінде түсуін бақылап отырамыз, – дейді теміржол саласының жас маманы.

Жазираның анасы станцияда жүк қабылдап-жөнелтуші, әпкесі де есепші болып теміржолда еңбек етеді. Сондықтан отбасының ортақ тақырыбы да теміржол. Талантты теміржолшы қыз бос уақытында түрлі тағамдар пісіргенді, би билеп, кітап оқығанды, массаж жасағанды ұнатады. Үнемі ізденісте жүретін ол бағындырар белестерім әлі алда деп санайды.