Бәрі батыр, бәрі қаһарман
Абай облысы бойынша меншікті тілші
Жеңіс мерекесі өтсе де, оның жаңғырығы жер-жерде әлі де жалғасуда. Семейлік теміржолшы жастар «ҚТЖ» ҰК» АҚ бойынша қолға алынған «2020 қайырымды іс» бағдарламасы аясында «Ардагерлерді ардақтайық!» жобасын әрі қарай да сәтімен жалғастырып жатыр.
Осыған дейін бөлімшедегі Жастар ұйымының белсенділері қаладағы соғыс ардагерлеріне, Ленинград блокадасында және фашистік концлагерь тұтқынында болғандарға мерекелік сыйлықтар таратқан болатын.
Қаладағы карантиннің жалғасуына орай, жастар қауымы акцияны сақтық шараларын толық сақтап жалғастыруда. Өткен аптада олар қалада тұратын тыл ардагерлеріне көмек көрсетіп, азық-түлік қоржынын таратты.
Жалғызілікті қарттардың үй-тұрмыс жұмысына көмектесіп, ауласын тазалап, шарбағын түзеп, қоқысын шығарып дегендей шаруаларына қолғабыс жасауда.
Айта кету керек, аталмыш шаралар «Самұрық-Қазына» әл-ауқат қорының демеушілігімен, «ҚТЖ» ҰК» АҚ бастамасымен ұйымдастырылып жатыр. Семейдегі акция барысын бөлімше басшысы Сиязбек Әлішев қолдап, жастарға жәрдем көрсетуде. Бөлімшенің кадр қызметіне теміржолшылар арасында көмекке мұқтаждар тізімін жасап, оларға да қолқабыс жасауды тапсырды.
- Осыған дейін теміржолшы жастар қауымы бірлесіп «Ардагерлерді ардақтайық!» жобасы аясында Семей қаласында тұратын жалпы саны 25 соғыс ардагеріне арнайы әзірленген сыйлықтарымызды жеткізген болатынбыз. Ал, осы жолы тыл еңбеккерлерін араладық.
Әңгіме-дүкен құрып, өткен өмірлерінен тағылымды естеліктерін тыңдадық. Жастық шағын Жеңіске қол жеткізу үшін бейнетті еңбекке арнағандар қандай құрметке болмасын лайық деп білеміз. Біз үшін олардың бәрі батыр, бәрі қаһарман. Кейінгі буын үшін өнеге болсын деп, барлығының соғыс жылдарындағы, соғыстан кейінгі теміржол саласын өркендетуге арнаған еңбек жылдары жайлы бейне түсірілімдер жасадық. Қазіргі уақытта бейнефильмдер даярлап, деректі туындылар әзірлеу үстіндеміз. Олардың барлығы алдағы уақытта әлеуметтік желілер арқылы бүгінгі өскелең буынға паш етілетін болады, - дейді аталмыш іс-шараны ұйымдастырушы теміржолшы жастар қауымы.
Жастар үшін көнекөздердің шерткен әңгімелері тарихи кинолардың оқиға желілерімен пара-пар болғаны анық. Тыл ардагерлерінің арасында небір қилы тағдыр иелері бар екен. Бірі сұрапыл жылдары киім цехында күн-түн демей майданға жылы киім-кешек тігіп жөнелтумен айналысса, енді бірі жасөспірім шағында-ақ өгіз жегілген соқамен егін егіп, қол орақпен астық жинаған. Олардың қай-қайсысы да қаһарман деген атқа лайық.