Мерекеде қуаныш сыйлады
Жыл сайын балаларды қорғау күні мерекесіне орай қыдырып, қызық көріп, түрлі сыйлық алып мәз болатын кішкентай бүлдіршіндерді биыл да құр қалдырмас үшін теміржолшылар түрлі амалын жасап жатыр.
Солардың бірі – Қызылорда белгі беру-байланыс дистаницясы. ШЧ-39 ұжымының кәсіподақ төрайымы Мария Шайкемелова, кадр бөлімі маманы Жанар Есенқараева бастаған топ балалар күні қарсаңында 6 отбасының 30-ға жуық бүлдіршініне мерекелік көңіл-күй сыйлады.
Ұжым басшылығы мен кәсіподақ ұйы мының келісімімен алдын ала көпбалалы жанұяларға көмек қолын созып, сыйлық жасау келісіліп, күні-бұрын дайындалып қойған базарлық – түрлі тәттілер мен ойыншықтар, қызықты кітапшалар үлкен отбасылардың кішкентай мүшелерін қуанышқа бөлегені анық.
Олардың қатарында метролог Қаршыға Оразованың, СОБ электромеханигі Ермек Есенжолдың, байланыс электромеханигі Жарқынбек Әділбектің, Лаз электромеханигі Нұрлыбек Елемесовтің, жүргізуші Расул Алмасбаевтың отбасыларының бүлдіршіндері болды.
– Жыл сайын балаларды жинап қалада қыдыртып, көрікті жерлерге серуендететінбіз, одан қалды киноға апарамыз, балмұздақ жей міз, қысқасы, қызық көп болатын.
Биыл мына жағдайға байланысты бәріне тыйым болып тұрса да, қолдан келгенше балаларымызға мерекелік көңіл-күй сыйлауға тырыстық, – дейді кәсіподақ төрайымы Мария Шайкемелова.