Қайыр қылсаң, бүтін қыл
Абай облысы бойынша меншікті тілші
Шығыстағы теміржолшылар «Біз біргеміз!» республикалық акциясын әлі де жалғастыруда. Облыс бойынша карантин шаралары 13 маусымға дейін ұзартылғандықтан бұл бағыттағы шаралардың берері мол болып тұр.
Бүгінде екі мыңның үстінде теміржолшы тұратын Аягөз станциясы осынау республикалық деңгейдегі акцияға атсалысуда аймақтағы барлық ұжымдардан алда келеді.
Мәселен, жуырда «Nur Otan» партиясының Аягөз аудандық филиалының ұйымдастыруымен Аягөз белгі беру және байланыс дистанциясы ұжымының демеушілігімен қалада тұратын аз қамтылған және көпбалалы 10 отбасыға бірінші кезектегі қажеттіліктегі азық-түлікпен бір жолғы көмек көрсетілді.
Теміржолшылар аудандық әкімдіктен алынған арнайы тізім бойынша әзірленген көмек қоржынын өздері үлестіріп шықты. Мұндай шаралар наурыз айынан бастап үзбей жалғастырылып келе жатқанын айта кету ләзім.
Ал білікті басшы Айдос Жұлдызбаев жетекшілік ететін ШЧ-30 мекемесі «Біз біргеміз!» акциясы аясында Аягөз теміржол торабындағы барлық мекемелер арасында алдыңғы орында тұр.
– Елбасының бастамасымен қолға алынған акция аясында соңғы үш ай көлемінде көптеген қайырымдылық шаралары ұйымдастырылды.
«Қайыр қылсаң, бүтін қыл» демекші, біз мұны тек карантин кезінде ғана қолға алмай, жыл бойы жағдайы төмен жандарға көмектесуді жалғастыра беретін боламыз, – дейді дистанцияның кәсіподақ ұйымының төрағасы әрі жетекші инженер Еркін Айымов.