Светаның өнеріне тәнті
Елорданың бас станциясының жоспарлау-экономика бөлімінің жетекші инженері Светлана Претцердің өнеріне тамсанбайтын адам кемдекем. Оның қолынан шыққан ғажап дүниелер қарапайым заттардан жасалғанмен, олардың құндылығы мен сапасы өте жоғары.
Өзінің айтуынша, ол бар ғұмырында сурет салмай немесе шығармашылықпен айналыспай жүрген кезі жоқ. Үнемі қиялында, ойында бір сызбалар үлгісі, суреттер нобайы жүреді де, соны бір күні қағаз бетіне түсіреді немесе заттай қолдан жасап жүзеге асырады.
Табиғаттағы түрлі ұсақ заттардан ол әдемі әшекей бұйымдар, сыйлықтар, қобдишалар мен картиналар, бойтұмарлар мен сувенирлер, гүлдестелер мен шашқа тағатын түрлі әшекейлер, құрғақ жемістер мен жаңғақтардан сыйлықтар жасап шығарады.
Бір айта кетерлігі, еңбегі қатты бағаланса да, ол осы еңбектерін сатып, табыс табуды ойламапты. Сүйікті хоббиі тек адамдардың қуанышына ортақтасқанда сыйлық ретінде ұсыну үшін жасалады немесе шығармашылық шабыты оянғанда жасалып, үйінің төрінде ілулі тұрады.
– Сурет салуға бала кезден құмармын. Әкем – ағаштан түйін түйіп, темірден де түрлі дүние жасайтын шебер болған. Ал анам қолынан бал тамған аспаз болды. Теміржолшылық та менің қанымда бар. Анам мен әкем жағынан ата-әжелерім – темір жолда еңбек еткен жандар. Қолөнершіліктен бөлек өзім кейде сантехниктің де орнын алмастыра аламын, кейде тіпті дрельмен жұмыс істеп, ұста да болып кетемін. Ең бастысы – менің мақсатым адамдарға қуаныш сыйлау, сол қуанышты өз қолымнан шыққан дүниелерді сыйлап жасағым келеді. Екі ұлымнан 3 немерем бар. Балалар өсіп, олардың кішкентайлары балабақшаға барғанда менің қолөнершілік қабілетім тіпті дами түсті. Мен солармен бірге қолдан түрлі дүние жасап, оларға көп нәрсе үйреттім, – дейді Светлана.
Оның қолынан шыққан безендірілген сыйлық бөтелкелер, жеміс-жидек дестелері, тұзды қамырдан жасалған картиналар мен қолөнер бұйымдары, әдемі безендірілген құттықтау хаттар, фоамариннен жасалған жаңажылдық ойыншықтар, рюмкалар мен фужерлерден әзірленген қоңыраушалар мен шам қойғыштар Светлананың айналасындағы жақын жандарын таң қалдырып, қуантып жатады екен.
Және олар бір-біріне мүлдем ұқсамайды. Әр туындысын ерекше ыждаһаттылықпен, махаббатпен, көңіл бөле отырып жасайтындықтан оның туындыларын көргендер көз алмастан ұзақ сүйсіне қарап, өнеріне, фантазиясына тәнті болады. Ал оның теміржолдағы қызметіне келсек, кәсіби қызметіне де адал, 20 жылдан астам уақыт бойына болат жолда еңбек етіп келеді.
«Теміржолшылар династиясынан қазір ата жолын жалғап келе жатқан жалғыз менмін. Мен үшін станция – екінші үйім секілді болып кеткен. Мұндағы әріптестерімсіз өмірімді елестете алмаймын. Менің шығармашылық шабытымды қанаттандыратын да солар. Себебі ұжымда өтетін түрлі мәдени шараларда менің еңбектерім жоғары бағаланады, бәрі де Света не сыйлар екен деп күтіп жүреді», – деп күледі ол.
