Теміржолшыларға түрлі қолдау көрсетілуде
Маңғыстау облысы бойынша меншікті тілші
Халыққа жаудай тиген індет теміржолшыларды да айналып өтпеді. Маңғыстау теміржолында онымен күресу және алдын алу шаралары алғашқы күннен бастап бірінші орынға шыққан. Оған бөлімше басшыларынан бастап, әрбір мекеме кәсіподақтарының қолдау шаралары бір бөлек.
Сovid-19 пандемиясы басталғалы түбек теміржолының кәсіподақ ұйымдары теміржолшыларға түрлі деңгейдегі қолдау көрсетіп келеді. Коронавирус жаңа тарай бастаған тұста Маңғыстау жүк тасымалы бөлімшесінің кәсіподағы бөлімшедегі жұмысшыларға 2 200 дана бетперде таратқан еді. Бөлімшеге қарасты мекемелердегі кәсіподақ ұйымдары да өз мекемелеріне антисептик, тазалықты сақтау, қорғану құралдарын алып берді. Сovid-19 пневмониясы өршіген кезде кәсіподақтар тағы да қарап қалмады. Дереу қаражат бөлу мәселесін қарастырып, теміржолшыларға жәрдемдесуге кірісті. Мекемелерге антисептик, сабын, ғимараттың ішін залалсыздандыру құралдарын алып берді.
− Теміржол мекемелеріне жақында тағы бір партия антисептиктар, сабын, қолғап сияқты ең қажетті деген нәрселерді алып тараттық. Сонымен қатар бір апта бұрын аймақ теміржолшыларына арнап он мың дана маска сатып алғанбыз. Оның бес мың данасы Маңғыстау жүк тасымалы бөлімшесіне, қалғаны Маңғыстау магистарльдық желі бөлімшесіне таратылды. Сондай ақ, пневмония дерті өршігелі пневмониямен ауырған теміржолшылардың дәрі-дәрмегі үшін материалдық көмек көрсетілуде. Қазірге дейін жүк тасымалы бөлімшесі бойынша отыз шақты адамға әрқайсысына 30-40 мың теңгенің айналасында қаражат бөлінді. НЖС мекемесінен әзірге ешкімнен ондай сұраныс бола қойған жоқ. Қазір біз бұл қолдау шарасы туралы алыс-жақын телімдеріміздегі теміржолшыларға хабарлап, естімей қалғандар болса, құлақтандыру жұмыстарын жүргізудеміз, – дейді Орталық теміржолшылар кәсіподағының Маңғыстау облысы бойынша өкілі, Маңғыстау жүк тасымалы бөлімшесі кәсіподағының төрағасы.