Аса станциясының теміржолшылары сауапты іс жасады
Жамбыл жүк тасымалы бөлімшесіне қарасты Аса станциясының теміржолшылары қой сойып, оның етін мұқтаж отбасыларға үлестірді. Бұл екінші класты станцияда отыз шақты теміржолшы еңбек етеді. Олар ортадан қаражат жинап, осындай сауапты іс атқарғанды жөн көрген. Станция бастығының орынбасары Нұрсұлтан Тұрсынбаев жастардан түскен сауапты бастаманы ұжым қуана құптағанын айтты. Малдың еті Аса ауылындағы әлеуметтік ахуалы төмен, көп балалы бес отбасыға таратылыпты. Ол шаңырақтардың тізімі жергілікті әкімдіктің жұмыспен қамту орталығынан алынған. Станция қызметкерлері осындай шараны жыл сайын ұйымдастырып, дәстүрге айналдырғанды жөн көріп отыр.
«Теміржолшылар мұндай игі істі асып-тасып отырғандарынан емес, қазіргідей қиын-қыстау заманда, пандемиялық ахуал алқымнан алған кезеңде күнкөрістері өзімізден де төмен азаматтарға тамшыдай болсын демеу болса екен деген ниетпен жасады. Әрқайсымыз айналамызға мейірімімізді шашып, шама-шарқымызша қол ұшын созып, жәрдем беретін болсақ, қазіргі әлемді жақсы жағына өзгертер едік. Әр қоғамда көптеп кездесетін мүмкіндігі шектеулі азаматтардың, жұмыссыз жандардың көңілдері бір көншіп қалар еді», – деді Аса станциясының кезекшісі Мейірлан Қойшыбаев.
Әлеуметтік жағдайы төмен отбасының бірі Күлсара Әбілдаева көп балалы екен. «Ауылымыздағы теміржолшылардың бұл қайырымдылық ісіне алғыс айтамыз, екі-үш асым ет көп болмаса да, олардың ниеті мен пейілі үлкен еді. Олардың ісі өзге қалталы азаматтарға үлгі болып, мынадай қиын-қыстау заманда қайыр жасауды ұмытпағай», – деді Күлсара ана. Аса станциясы өндірісте де озаттар қатарында. Екінші класты станция негізінен жүк пойыздарына қызмет етеді. «Қазфосфат» ЖШС-ның жүк түсіруіне, жүк тиеуіне, вагондарына қызмет көрсетеді. Минералды рудалармен жұмыс істейді. Станция арқылы сары фосфор, мұнай, жанар-жағармай түрлері тиелген вагондар ағылып жатыр.