Достық станциясында өндірістік қауіпсіздік және экология мәселесі жіті бақылауда
«Қазақстан теміржолшысы» газетінің тілшісі
Қазақстан темір жолында осыдан үш жыл бұрын барлық салада өндірістік қауіпсіздік және экология секторы құрылды. Достық станциясында осы секторды басқаратын Батыржан Ахметжановтың айтуынша, қауіпсіздікті қамтамасыз етуге жан-жақты жауапты сектор қызметіне сенім мол, деп хабарлайды Rail-news.kz. Бүгінде Достық станциясында 800-ге жуық адам еңбек етсе, 3 адам аталған сектордың жұмысына тартылған. Жас та қабілетті маман Батыржан Ахметжанов басқаратын сектор жұмысы қауіпсіздікті қамтамасыз ету бойынша жұмыстарды мінсіз атқарады.
– Негізгі қызметімізге экологиялық, өнеркәсіптік, өртке қарсы, санитарлық-эпидемиологиялық, электр қауіпсіздігі, адамның денсаулығы мен өмірінің қауіпсізді- гін қамтамасыз ету жатады. Соның бәрінің сақталуын күнделікті жұмыс барысында еңбек қорғау шаралары аясында қадағалап отырамыз, – дейді сектор басшысы.
Ал қадағалау тексерулер жүргізу арқылы жүзеге асырылады. Басшылардың нормативтері кезінде де сектор қызметкерлері бірге еріп жүреді. Жұмыс киімімен қамтамасыз ету жайын да бақылауда ұстайды. Жұмыс орнын аттестациялау да басты міндет.
– Экология бойынша айтар болсақ, өндірістен шыққан қатты тұрмыстық қалдықтар, шлактар болады, қауіпті қалдықтар болады, олардың өзінің сақталу әдістемелері бар, соны сақтау керек. Солардан келетін зардапты азайту, айыппұлдарын төлеу мәселелерін реттеу біздің құзырымызда, – дейді Б.Ахметжанов.