Тараздағы арнайы колледждің 200 түлегі теміржолшылар қатарын толықтырды
Тараз теміржол көлігі және коммуникация колледжі – байырғы оқу орындарының бірі. Түркістан-Сібір темір жолының құрылысы басталғанда оған теміржолшы мамандар дайындау үшін ашылған оқу орны күні бүгінге дейін болат жолға қызмет етіп келеді, деп хабарлайды Rail-news.kz. Колледждің директоры Ұлжан Кенжебаеваның айтуына қарағанда, бұл білім ордасынан ұзақ жылдар бойы теміржол саласына қатысты 40 мыңнан астам орта буын мамандары оқып шыққан. Қазіргі таңда мұнда білім алушылар темір жолдың жылжымалы тартқыш құрамын пайдалану, жөндеу және техникалық қызмет көрсету түрлері бойынша мамандықтарды игереді. Сонымен қатар темір жолдың вагондар мен рефрежираторлы жылжымалы құрамын пайдалану, жөндеу және техникалық қызмет көрсету, теміржол көлігіндегі автоматика, телемеханика және қозғалысты басқару түрлері негізінде білімдерін шыңдайды. Бүгінде колледжде 500-600 шамасында студент оқиды. Былтырғы оқу жылының соңында 254 түлек үлкен өмірге жолдама алса, биылғы оқу жылында 200 студент ұядан ұшқан. Ұлжан Қайыпбекқызы түлектердің дені теміржол саласына жұмысқа баратынын айтады.