Арыста әулеттер арасында футболдан жарыс өтті
Шымкент қаласы бойынша меншікті тілшісі
Өткен аптада Арыс қаласындағы Игібай спорт алаңында «Бір атаның балалары» отбасылық командалар арасында футболдан жарыс өтті. Жарысқа 5 команда қатысып, айналым жүйесі бойынша барлық қарсыластар бір-бірімен кездесіп шықты, деп хабарлайды Rail-news.kz. Жарысты ұйымдастырып өткізген – Арыс қаласына белгілі Рысбековтер теміржолшылар әулеті. Тәуелсіздіктің 30 жылдығы құрметіне өтіп отырған отбасылық спорттық жарыс Арыста дәстүрге айналған десек болады. Ойынның шымылдығын ашып, командаларды таныстырған отбасылық ойынның негізін қалаған теміржолшылар әулетінің өкілі Панзарбек Жаңабаев көпшілікті «Бір атаның балалары» әулеттер арасындағы сайыстың бес жылдығымен құттықтады. ПЧ-54 Арыс жол дистанциясының бастығы Махмұд Еркінбекұлы барлық ойыншыларға сәттілік тіледі және жарысқа демеушілік жасап отырған Рысбековтер әулетіне барша командалар атынан алғыс айтты. Ауа райының салқын да ызғарлы екеніне қарамастан командалар ә дегеннен ойынды қызу бастап кетті. Футбол алаңының көрігін қыздырып, бір-біріне дес бермеген командалардың қай-қайсысы да кәнігі ойыншылардан кем түспеді. Әйтсе де, талай жыл тәжірибе жинақтап қалған, бірде-бір ойыннан қалмай қатысып келе жатқан Жаңабаевтар әулетінің бағы жанып, қарсыластарының бәрін айқын басымдықпен жеңіп, жүлделі бірінші орынды иемденді.
«Біздің әулет үшін бұл жеңістің орны бөлек. Өйткені, бес жыл үзбей қатысып келе жатсақ та бірінші орынды енді ғана иемденіп, жеңіске қол жеткізіп отырмыз», – деп қуанышымен бөлісті команда мүшесі П.Жаңабаев.
Жүлделі екінші орынды Қансейітовтер отбасылық командасы иеленсе, 3-орынды Рысбековтер, 4-орынды Садыбековтер, 5-орынды Ізбасаровтар өзара бөлісті.