Ақтөбеде «Теміржолшы» спорт кешені ашылды
Ақтөбе облысы бойынша меншікті тілші
Ақтөбедегі Әуе қалашығы ауданында ашылған спорт кешені жергілікті теміржолшыларды шексіз қуанышқа бөледі. Отан қорғаушылар және Жеңіс күні мерекесіне орай "Теміржолшы" спорт кешенінің ашылу салтанатына спортсүйер қауым көп жиналды.
Спорт кешені көпшілік көңілінен шығатындай жабдықталған. Қажетті спорт құралдары да жеткілікті. Сондай-ақ, спортшылар үшін санитарлық-тұрмыстық жағдайлар да талапқа сай жасалған. Фитнес залы, ауыр атлетика, күрес құралдары, гимнастика, жүгіру қондырғылары бәрі бар. Қысқасы, жан-жақты спортпен шұғылдануға мүмкіндік мол. Кешен сала кәсіподағының қаржылық демеушілігімен ашылып отыр.
Ардагерлер мен теміржолшылар осы орталықтағы спорттық аппараттарды отбасымен тегін пайдалана алатыны да айтылды.
Нысанның ашылуына арнайы келіп қатысқан Салалық кәсіподақ төрағасының орынбасары Бақытжан Қуанышев құттықтау сөз сөйлеп, заманауи спорт қондырғыларымен жабдықталған кешеннің әрбір теміржолшыға жігер беріп, серпіліс сыйлайтынына сенім білдірді.
– Кезінде Батыс Қазақстан теміржолының құрамында барлық әлеуметтік нысандар, спорт кешендері, бассейн, аурухана, мектеп, балалар бақшасы, шипажай – бәрі болды. Кейін Қазақстан темір жолы құрылып, әлеуметтік нысандар жергілікті басқару орындарының балансына өткесін, біз талай игіліктен айрылдық. Бүгін, міне, сол олқылықтың орнын толтырып, теміржолшылар өз спорт кешеніне ие болып жатыр. Биыл Көлік кәсіподағының құрылғанына 30 жыл. Мерекенің басы – осы спорт кешенінің ашылуы. Алда талай игілікке куә боламыз деп ойлаймын, қуаныштарыңыз құтты болсын, – деді Бақытжан Мұханбетұлы.
«Бүгінгідей қиын да күрделі кезеңге қарамастан осындай мүмкіндік сыйлап, жаңа заман талабына сай жаттығу орталығын ашу әр теміржолшыға жасалып отырған қолдау деп білеміз. Теміржолда жетістіктер көп болсын, елде бейбіт өмір болсын», – деп батасын берді ардагер теміржолшы Жеткерген Әлиев.