Тастаяқ шеберлері анықталды
Түркістан облысы бойынша меншікті тілші
Шымкент бөлімшесі кәсіподақ ұйымының ұйымдастыруымен «Принц» бильярд клубында аталған спорт түрінен турнир өтті.
Қазақстан тәуелсіздігі күні мерекесі мен «Қазкөліккәсіп» ҚБ ұйымының 30 жылдығына орай өткізілген спорттық тастаяқ сайысына 15-тен астам теміржолшы қатысып, кіл мықтылар анықталған.
«Қазкөліккәсіп» ҚБ Шымкент филиалының спорттық шараларды ұйымдастырушы-нұсқаушысы Елена Маньшинаның айтуынша, теміржолшылар арасында саламатты өмір салтын ұстанып, спортты серік етуді дағдыға айналдырған жандар көп. Соған орай «Қазкөліккәсіп» ҚБ Шымкент филиалы теміржолшылар арасында сан түрлі спорттық шараларды тұрақты түрде өткізіп келеді. Ал бекзат ойын – бильярд ойнайтындар да аз емес екен және шеберлігі бір-бірінен асып түсіп жатты. Айталық, жол дистанциясы мен белгі беру және байланыс дистанциясы, Шымкент станциясы, Арыс локомотив пайдалану депосының ТД-16 бөлімі, магистральдық желі дирекциясы мен «Вагон пайдалану депосы» АҚ-ның жұмысшылары арасында тартысты өткен жарыста үш үздік жеңіс тұғырынан көрінді. Олар: Шымкент станциясының операторы Миранбек Мырзағұлов пен жол дистанциясының 5-ші разрядты жол шебері Мақсат Жолдасов және ТД-16 мекемесіне қарасты электровоз машинисінің көмекшісі Нұрболат Салходжаев. Барлық жеңімпаздар бағалы сыйлықпен марапатталды.